Ralhrang In Lo Hnatuan Chinmi 3 An Kap That

Chin ramkulh Mindat khawpi sungih um ralhrang pawl cun tuini June 16 zinglam nazi 9 hrawngah ralthuampi in kiangkap an kap ciamco ih, lo hnatuan chinmi 3 an kap that ngah.

Ralhrang ih kah thatmi Chinmi 3 cu nunau 2 le mipa pakhat an si. An zaten lo hnatuan an si ih, kum 70 putar, kum 60 pitar le kum 30 nupinu pawl an si. Raltlan pawl umnak khalah ralhrang pawl ih kahsuahmi ralthuampi a tla ih, raltlan pawl beunak inn 4 a siat tlunah mi pakhat ralthuampi in a tlak ngah ih, hriam a ngah.

CDF Mindat cun June 14 zingah Mindat khawpi luhnak ih ralhrang pawl an rak kap ih, khawpi sung lah-wah-kah kiangih ralhrang pawl khal an kap bet. Khawpi sungih doawknak ahcun ralhrang 5 an thi tin Mindat CDF cun thu an rak suah.

Mindat CDF thuphuangtu Ha Awm cun “Kanmah CDF Mindat pawl umnak in kap khal a silo,duhduh in kiangkap an kap hrim. Mindat khawpi sungih ralhrang kan do hnuin pehcilh in ralthuampi an kap ciamco hrih. Hivekin mipi tuar ding zawngih an cangvaih ruangah phuba kan la rori ding a si,” tin a sim.

A tufang thlanglam laitlang lamin Mindat, Kanpetlet le Matupi pawl ah mipi ralkap le ralhrang ralkap pawl an do aw rero ih, doawknak kiangkap ih um mipi pawl cu khua ah um ngam loin khua an suahsan. Thlanglam laitlang ih doawknak a sosan bangin June 16, zinglam nazi 11 hranwg khalah ralhrang mawtaw 4 in Chin ramkulh Tedim lam an rak pan ih, a hnuah ralhrang mawtaw 13 in Tedim lam an pan bet. Ralhrang pawl cu Tedim peng sungah an cangvai ding maw, Falam lole Hakha lam feh an tum timi cu felfai in theih a silo.

Pyu Saw Htee 6 An Thi – Sagaing ramthen Chuang Oo myone ah mipi inn urkang ih, mipi 4 thattu ralhrang le Pyu Saw Htee pawl cu Chuang Oo pDF in bomb puah in an do ih, Pyu Saw Htee 6 an thi tin thu an suah.

Chuang Oo PDF cun “Mipi inn urkang ih, sualnak nei lo mipi 4 thattu ralhrang ralkap pawl cu bomb 5 in kan rak puah. Bomb puak ahcun ralhrang ralkap lamin thi an tam ih, ralthuam hrekkhat le ralhrang fawm hrekkhat kan la ngah. Ralthuam laksakmi khal kan nei ih, ralhrang thi pawl cu anmah in an phur cih.

“Chuang Oo myone sungih ralhrang pawl bawmtu Pyu Saw Htee pawl umnak khal kan kap cih ih, Pyu Saw Htee 6 an thi. Kannih lamin pakhat hriam ngah a um nan, a bese lo. Ralhrang do an tul bangin, ralhrang pawl bawmtu Pyu Saw Htee pawl khal do vivo ding an si,” tin thu an suah.