Chin ramkulh Matupi in Mindat lamih feh ralhrang ralkap pawl cu lamzin tluanah Mindat CDF in theitawk in an rak do ih, ralhrang ralkap pawl ih tomi mawtaw bomb an puah rero thu mipi theihternak an nei rero zo.
May 13 ahcun Mindat CDF pawlin Matupi le Mindat karlak ah ralhrang pawl ih mawtaw thuhmi an hmu ih, anmai bomb puah siatmi a rak si. Ralhrang pawl cun bomb puak ruangih an mawtaw siat cu a ke le thilri dang tha an lak hnuah a mawtaw cu lamzin zirah an hlon ih, thinghnah in an khuh. Cucu, Mindat CDf pawlin an hmu fuh.
Mindat CDF thuphuangtu Salai Ha Awm cun “Ralhrang pawlin an mawtaw siat pakhat cu lamzin sirah an hlon ih, thinghnah in an khuh. Mawtaw lamzin ih feh men cun a hmuh theih lo. An mawtaw a siat, hman a theih nawn lo timi cu ralhrang lamin mipi theihter an duh lo ih, an thup siko,” tin a sim.
Matupi in suak ralhrang ralkap mawtaw 70 tlun cu may 13 zanlam ah Mindat khawpi an lut zo tin Mindat CDf cun mipi theihternak an nei. Ralhrang mawtaw pawl cu Mindat in Kyauk Htuh lam feh vivo dingah ruah an si.
Leave a Reply