Ralhrang In Rampi Thuneihnak An Lak Hnuah Chinmi 355 An That Zo

Ralhrang In Chinmi 355 An That Zo – Ralhrang ralkap in rampi thuneihnak an lak hnu thla 22 sungah Chinmi 355 an that zo tin’ hminsin tuahtu ICA cun thu an suah.

ICA cun “Ralhrang in 2021, February 1 ah ralthuam rinsan in rampi thuneihnak an rak la ih, 2022 November thlacem ah thla 22 a kim. Thla 22 sungah ralhrang cun Chin ramkulh sung hmun tinkim ihsin Chinmi 355 an that zo. Ralhrang in Chinmi tamzet an thah bangin Chin ramkulh sungin inn 1505 khal an urkang zo.

“Chin ramkulh sungah mipum ting 5 fang lawng kan um ih, siatnak kan tonmi a rapthlak tuk. Thla 22 sungih Chinmi 355 thi lakah sualnak nei lo mipi 167 an tel ih mipa 132 le nunau 35 an tel. Ralhrang ih thahmi lakah kum kim lo mipa 19 le nunau 5 an tel. Pawh fawp lai nauhak khal ralhrang ruangah an thi ih, Pathian hnatuan 4 khal ralhrang ruangah an thi.

“Ralhrang ruangih thi Chinmi 355 lakah mipi ralkap pawl an tam bikih mipi ralkap 186 an thi zo. Rlahrang ruangih Chinmi 355 thi lakah mi 10 pawl cu daiziar ih lamzawh duhphorhnak neih ruangah ralhrang pawlih thahmi an si. Mi 33 pawl cu ralhrang in an sualpi, an hrem ciamco hnuah thi an si ve. Chinmi 9 pawl cu ralhrang in meisa in an urkang that ih cumi lakah mi 7 pawl cu a ruang khal hmuh a silo.

“Mithi lakah raltlan 17 an telih ralhrang ruangah tuamhlawm aw thei lo ih, thi an si. Ralhrang kammi bomb palpuak ruangah chinmi 17 an thi zo ih, ralhrang in ralphaw ih an hman ruangah Chinmi 9 an thi zo. Thawnginn sungah Chinmi 3 kah that an si. Chin ramkulh sung buainak ruangah Chin ramkulh ah raltlan thawng 4 tlun an um zo ih, Mizoram le Manipur lamah Chin raltlan mipum thawng 50 kiangkap an um a si,” tin ICA cun thu an suah.

UN Ah Myanmar Palai Hril Thei Hrih lo – Ralhrang in rampi thuneihnak an lak hnuah ralhrang le NUG cun UN ah palai si an duh aw rero ih, tuini tiang UN cun Myanmar palai an hril thei hrih lo.

Tufang ih UN Myanmar palai cu U Kyaw Moe Tun a si ih, UN in NUG palai ah an pom lo ih, ralhrang palai khalah an pom lo. Myanmar ram a buai hlanih Myanmar UN palai a si ruangah cumi vekin UN cun U Kyaw Moe Tun cu UN Myanmar palai ah an hmang hrih. Tuitum UN Meeting ah ramdang palai pawl hril a sinan, Myanmar thuhla ahcun China le Russia in Myanmar UN palai cu kan hril duh hrih lo ding tin thu an bur ih, UN ah Myanmar palai hril fel hrih loin a caan an thawn bet.

Hitin U Kyaw Moe Tun cu UN ah Myanmar palai a si hrih ding nan, NUG khal ai a awh lo dingih, ralhrang khal ai a awh lo ding. UN palai hlun a sinak vekin a feh hrih ding. UN ahcun Myanmar ram hruaitu khal thleng danglam a si hrih lo. UN ih ram hruaitu hmin ah Daw Aung San Suh Kyi le U Wint Myint an umlai.

Indonesia Ah Tlang A Puak – Indonesia ram Java hmunram Mount Semeru tlang cu December 4 ah a puak ih, tlang puak ruangah mi tampi hmunhim ah tthawn phah an si.

Tlang puak ruangah a kiangkap a kang nasa tukih cozah cun dinhmun 4 ah retin ralrinnak thu an suah. Tlangpuak a nasat tuk ruangah a kiangkap ih um khua pawl cu hmunhim panter an si. Tlangpuak ruangah tisa vek leimin a tawlh rero ih, mipi cu tiva kiangap ah um lo dingin theihter an si.

Indonesia ahhin tlangkang le tlangpuak a tam ngaingai ih,nikum khalah tuitum ih puak Mount Semeru tlang a rak puak zo. Nikum tlangpuak ahcun mi 50 hrawng an thih phah ih, mipi 100 tlun in hliamhma an rak ngah phah.