Sagaing ramthen Kalaymyo Tahan , Nicia Taih kiangih ralhrang umkhawm cu may 28, zanlam nazi 5:30 hrawngah mipi ralkap komkhawm in an kap ih, ralhrang pawl cun Tahan le a kiangkap ralthuampi in an kap ciamco.
Tahan ih an doawk thu ah Zomi PDF cun “May 28, zanlam nazi 5:30 hrawng ihsin kannih Zomi PDF, CSS, Kalay PDF , CNDF le GRD pawlin Tahan nicia taih kiangih umhmun khuar ralhrang ralkap pawl kan kap ih, ralhrang 2 an thi. Kan zum dan vek asile ralhrang 4 hrawng hriam ngah an um. Zan nazi 8 hrawngah kannih mipi ralkap komkhawm cu thi le hriam ngah um loin himdam ten dung kan sip thei.
“Ralhrang kan donak san cu dik lo zetin mipi hnenih meisa man an dil ruangah, mipi hnenah meisa man dil lo dingin kan sim rero nan, an dil thotho ruangah ralrinpeknak hrang kap kan si,” tin thu an suah.
Doawknak a um tinten mipi tuar ding zawngih cangvai ralhrang ralkap cun duhduh in Tahan kiagkap cu ralthuampi in an kap ciamco ih ,mipi lamin mithi 3 an thi.
Sagaing ramthen Minkin myone ih doawknak ruangah Tahan ah raltlan innsang ih um nufa hnihte khal ralhrang ralthuampi in a tla ngah ih, an nunnak a cem. Daw Ni Ni Aye ( kum 47 ) le a fapa Bung Myat oo ( kum 26 ) cu ralhrang ralthuampi ih tlak thatmi an si. Tahan Wesley sizung dungih um Vanlallawmpuii ( kum 25 ) khal ralthuampi in a tlak ngah ih, may 29, zinglam nazi 1 hrawngah a thi. Nu Vanlallawmpuii cun a fa thla 6 mi a tanta.
Ralhrang cun an umhmun khuarnak Taungphila ihsin Kalaymyo Sekan khua khal ralthuampi in an kap ciamco ih, ralthuampi ih ngah ruangah nupinu pakhat a kut kehlam a bul.
May 28, zan thotho ah Sanmyo vengih Ah-Htah-kah 8 tlawnginn sungin inn 2 khal a kang. Tlawnginn kang thu ah mipi ralkap le ralrhang lam an puh aw veve. Mipi ralkap cun ralhrang ralthuampi in a tlak ruangah a kang an ti ih, ralhrang ralkap lam cun tlawngkai duh lo ah PDF pawl in an nawkkang tin thu an rak suah ve.
Ralhrang ralkap cun may 29 khalah Kalay PDF tatyin 2-nak la dingin mipum 150 thawn an luhcilh ih, Kalay PDF tatyin 2-nak pawl ih umnak buk 3 an nawkkang tin kalay PDF tatyin 2-nak cun thu an suah.
Kalay PDF tatyin 2-nak cun “May 29 ah ralhrang mipum 150 hrawng cun kannih Kalay PDF tatyin 2-nak pawl ih umnak buk 3 le Htauk Kyan khuathar in inn 4 an nawkkang. Ralhrang pawl cu Kalay PDF tatyin 2-nak la dingin ra an si ih, hlaral in bomb kan puah tikah ralhrang 5 an thi. Cumi hnuah ralhrang pawl cu Htauk Kyan khuathar ah an lut.
“Kannih lamin thi kan um lo tlunah kan ralthuam pawl khal kan la thluh man. Hmundang ah a thar in umhmun khuarsal ding kan si ruagnah ziangkim ah mipi bomnak kan tul a si,” tin thu an suah.
Ralhrang ralkap cun “May 29, sun nazi 12 hrawngah Miangsung khua dunglam ah PDF thawn kan do aw ih, doawknak ah kannih lam thi kan um lo. PDF 2 an thi ih, ralthuam hrekkhat kan laksak thei.
“Sun nazi 2 hrawng khalah Zuatit khua ah hmunram thianfainak kan nei ih, inn pakhat sungin PDF pawl ih thuhmi meithal zun 4, PDF fawm hrekkhat le thilri dang kan laksak thei. May 30 , zinglam nazi 6 hrawng khalah Kalaymyo Li-ing suh khua ih inn pakhat sungin kuttuah bomb kahnak pakhat tlunah ralthuam dang hrekkhat khal kan laksak thei a si,” tin thu an suah.
Ralhrang ralkap in PDF 2 kan kap that an timi cu PDF siloin mipi an kah thatmi PDF fawm an hruhter men tin PDF lam cun an sim.
CJDC In Ralhrang Hnuaiah Tlawngkai An Kham – Chin ralthuamkai pawlkom CJDC cun ralhrang phuanmi tlawng ah zohman tlawngkai lo dingin Chin mipi theihternak an nei ih, mipi uktu in tlawng an phuanmi ah tlawngkai dingin an theihter.
CJDC cun “Thuneihnak latu ralhrang ralkap cun an uknak fehtluang dingin tlawng phuan an tumih, timtuahnak an nei rero. Ralhrang ralkap cun ramleng ah ramsung a fehtluang timi langter duh ah tlawng phuan an tum.
“Curuangah, chin mipi nan zaten ralhrang uknak fehtluang lo dingin theitawk suah cio dingin kan lo sawm ih, mipi uktu ih tlawng phuanmi lawngah fale tlawngkaiter dingin kan lo sawm duh. Ralhrang in tluangten tlawng an phuan theinak dingah teltu CDM tuah lo pohpoh cu kannih CJDC in hremnak kan pe ding timi khal kan lo theihter duh a si,” tin thu an suah.
CJDC timi cu Chin ramkulh sungih dothlengnak ralthuamkai pawl komkhawm umnak pawlkom a si ih, CJDC ahcun CNA, CNDF le Zoland PDF tlunah Chin ramkulh sungih CDF pawl an tel thluh.
Leave a Reply