Ralhrang In Tedim Ah CNA Tin Mi 2 An Kap That

Chin ramkulh, Tedim khawpi ah hramlak ih vate pel dingih feh mawh nei lo khuami pahnih cu ralhrang in an that tin an sungte pawl cun an sim.

Chin ramkulh Tedim peng, Saizang khuami Pau Za Mang ( kum 29 ) le Pau Suan Thang ( kum 21 ) tei’ pahnih cu an rualpi pawl thawn vate pel in hramlak feh an si ih, an tlunlam Tedim khua sung an luh zawngah ralhrang pawlin an kai ih an that.

Pau Za Mang le Pau Suan Thang telin mi 13 pawl cu May 16 ah Tonzang peng, Mualpi khua lam pan in bike 7 thawn an feh ih May 21, zanlam nazi 3 hrawngah an khua ih an ra tlunnak lamzin Tedim khawpi Scott lamzin veng ah Pau Za Mang le Pau Suan Thang tei’ pahnih cu ralhrang in an rak kai.

“An pahnih in Tedim khua Scott lamzin veng tatkone kiangih eiin dawr in tlung ralhrang thawn an tongaw ih, ralhrang pawl cun an pahnih in an kai. Midang pawl cu hmaiah an feh ruangah an luat thei.

“Ralhrang ih kaihmi pahnih cun meithal an pai ih an hruaimi uico pahnih khal muka in an khuh ih bike parah an phurh kan hmu,” tin khuami pawl cun an sim.

An ramtawihpi rualpi pawl cun an pahnih in inn an tlun lo ruangah an theihmi ralhrang captain pakhat an suhhlam ih, Tedim khawpi tatkone ih ralhrang in an kaih thu an theisuak. Ralbawi cun Kalaymyo lamah kan kuat ding tin an rak sim bet. Asinan, vei tampi an suh ruangah ralhrang bawi cu a pha thei nawn lo ih, thah an si thu a rak simthei hai.

Pau Za Mang le Pau Suan Thang tei’ pahnih cu sungkhat naiawte an si ih an ruak khal an innsang lamin an lak thei lo ruangah May 23-24 ah Lai daan tein vuinak an tuah ding tin an sim.

Ralhrang thuthang cun “Tedim khua ah CNA sungtel pahnih cu meithal kengin an vak ih, ralkap pawl thawn an tongaw. Khat le khat an kahawk hnuah CNA pahnih an thi ih ,an ralthuam paimi khal kan laksak thei a si,” tin thu an rak suah ve.