Ralhrang In Thantlang Khua Sungin Inn 135 An Urkang Bet

Chin ramkulh Thantlang khawpi sunginn may 24 le 26 ah inn 135 a kang bet tin may 31 ah tuanvo neitu pawlin thu an suah.

May 24 le 26 ahcun Thantlang khawpi sungah CDF le ralhrang ralkap pawl an do aw ih, ralhrang 6 an thi tin CDF lam cun thu an suah. Doawknak a um tinten mipi inn urkang ringringtu ralhrang ralkap pawl cun Thantlang khawpi sungin inn pawl a urkang betih, a thok ah inn ziangzat ciah a kang timi felfai in theih a silo nan, tu ahcun inn 135 a kang bet tin an zongzoimi thu an suah.

Ralhrang in rampi thuneihnak an lak hnuah 2021, September thla in Thantlawng khawpi sungah ralhrang ralkap le CDF an do aw thok ih, ralhrang ralkap cun Thantlang khawpi sungin inn an rak urkang thok. Hivek ruangah Thantlang mipi pawl cu khua ah um ngam loin an rak tlan thluh ih, Thantlang khawpi sungah zohman an um nawn lo.

Chin ramkulh Thantang khawpi ah inn 2500 hrawng an um ih, ralhrang ralkap cun Thantlang khawpi sungin inn 1208 an urkang sak zo.

Ralhrang In Pa Za Hum Mang An Kap That – Ralhrang ralkap cun Chin ramkulh Falam peng Zawlpi khuami Pa Za Hum Mang an kap that ih, CNDF fawm an hruhter tin a sungte pawl cun an sim.

May 29 ah ralhrang ralkap pawl cun Zawlpi khua an rak luhcilh ih, mipi cu ralhrang tih ah an tlan thluh. Pa Za Hum Mang khal phruh tuah in a tlan hngal ve nan, ralhrang ralkap in an kai ngah ih, an kap that. An kah that hnuah a ruang khal thaten ret men duh loin an urkang.

A unaupa cun “Ka U cu ralhrang ralkap pawlin PDF ,CNDF na si tin an kai ih an kap that. An kah that hnuah CNDF fawm an hruhter ih, an urkang. Ralhrang ralkap cun ka U cu CNDF sungtel a si tin thu an suah. Thudik kan rel asile ka U cu PDF khal a silo ih CNDF khal a silo.

“Khua ih ralhrang pawl an luh tikah ka U khal tlan dingin tim a tuah ih, a phurh a tuah hnuah a tlan cih hngal. Asinan, ralhrang pawlin an kai ngah ih ,an kap that. A ruang khal an urkang. Ralhrang in hivek in ka U an kah that men tikah kan tuarna tuk lawlaw. Kum 37 fang a si ih, nupi le fate a fehsan a si,” tin a sim.

Ralhrang ralkap cun may 29 ah Zawlpi khua ah CNDF pawl an um tin Zawlpi khua an rak luhcilh ih, CNDF miraltha pakhat khal an kap that tin CNDF cun thu an suah.