Ralhrang In Zonglei Khua Ih Inn 5 An Urkang Sak

Falam in kalaymyo lam pan ralhrang ralkap pawl cun Falam peng Zonglei khua in inn 5 cu May 13 zingah an nawkkang.

Ralhrang ralkap mawtaw 20 tlun le tank mawtaw 2 cun Hakha in Falam an rak pan ih, Falam in Kalaymyo tiang feh vivo ding an si. Hakha peng Chunchung khua an thlen in mipi ralkap lam cun an rak do thokih ,an lamzin tluanah mipi ralkap pawl thawn an do aw phah vivo.

Do an si tikah ralhrang pawl cu mipi tuar ding zawngin an cangvai ih, lamzin tluanih khua pawlin mipi inn an nawkkang vivo phah. Ramthlo khua in inn 10, Tlangzar khua in inn 16 ,Parte khua in inn 7 le Zonglei khua in inn 5 tin ralhrang pawl cun lamzin tluanih mipi inn an urkang sak zo.

Ralhrang pawl cu Kalaymyo tiang feh ding an si ih, an mawtaw sungah thawngtla 15 an phur tin CNA cun an thusuahmi ah an telh.

Lamzin tluanih doawknak ah ralhrang thi an tamih, mipi ralkap lam khalin ralhrang thawn doawknak ah miraltha 8 an thi ih, bomb cangsualnak ruangih thi khal an um.