June 29 ah kalaymyo in Chin ramkulh saklam ih lut ralhrang ralkap mawtaw 28 pawl cu July 5 zan ah Falam kiangte Var Lilawn an thleng zo ih, tuini July 6 ahcun ralhrang mawtaw pawl cu Falam khawpi sung an lut zo. Mawtaw hrekkhat cu Hakha lamih lan cih khal an um.
Ralhrang mawtaw 28 lakah mawtaw 4 cu thilri phur mawtaw an si. Ralhrang hmanmi thilri phur mawtaw 4 cun thing, thir, le rua tivek an phur ih, ralhrang pawlin lilawn tuah an tum sipei maw tin kiangkap mipi cun an rel. Saklam Chin ramkulh sungin Lilawn siat ih theihlarmi cu Hakha le Thantlang karlak ih timit lilawn a si.
Thantlang ih doawknak a suah hnuah mipi ralkap lam cun Thantlang ih ralkap pawl eiin le ralthuam phur thei lo haiseh tin 2021, October 22 ah Thantlang le Hakha karlak ih Timit lilawn bomb an rak puah siat. Cumi hnu cun Thantlang ih ralhrang pawl cu helicopter in eiin le ralthuam pek theu an si.
Ralhrang ralkap pawl Falam in Hakha an pan tikah Hakha le Falam karlak ah mipi ralkap lamin bomb puah in an rak do ringring. Hivek ruangah Hakha le Falam karlak ih um khua mipi pawl cu an um a nuam nawn lo. Hakha le Falam karlak ih doawknak ruangah Falam le Hakha karlak ih um Lungrang, Thlanrawn, Taal, Tlangzar, Rialti le Chunchung khua ih inn tampi cu ralhrang ralkap pawlin an rak urkang sak zo.
Ralhrang pawl hi Timit lilawn tuah ding taktak an si maw timi thuhla ahcun anmah ralhrang in siseh, mipi ralkap lam khalin thusuah felfai an nei hrih lo. Asinan, Lilawn tuahnak ding awm-ang thilri an phurh ruangah saklam Chin ramkulh sungin Lilawn tuah ding umsun cu Timit Lilawn a si ve thung.
Hakha ih um pakhat cun “Kan dungah ralhrang pawl cun Hakha ih um Thantlang khua upa 4 an ko ih, thu an relpi. Ziang thuthup an rel timi cu kan thei lo nan, timit lilawn tuah ding thu an rak rel tel sipei maw tin mipi lam cu khat le khat kan sut aw rero ve. An thurelmi cu Thantlang khua remthat sal ding timi a si ih, Thantlang khua remthat an tum ahcun timit litlawn cu remthat hmaisat tul cu a siko,” tin a sim.
Chin Pastor Ih Phone Le Bike An Long – Yangon ramthen Hmawbi Zicho bazar vengih um Chin Pastor pakhat, Bible tlawng saya khal tuan phah cu July 5, zanlam nazi 3 hrawngah misual 4 in lamlak ah an rak dingter ih a phone le bike an long.
Pastor cun “Hna ihsin inn lamih tlung ka si. Minung malnak lamzin ah bike pahnih ah mi 4 phur aw cun lamzin in rak phit ih, khawitawk ah na feh ding ti’n in sut. Kei cun inn ah ka tlung zik tin ka sawn hai. Nam an phorh ih, phone le bike in pe awla feh aw in ti. Keikhal ka tih tukih, ka phone ka pek hnuah ka bike khal ka fehsan. keimah sawn ka him ih,zianghman ka cang lo tikah khatlam zawngin lungawiza ngaingai a si,” tin a sim.
Misual pawl an tlan hnuah kiangkap mipi a auh hai ih, misual rual cu mipi in an dumsal nan, an man nawn lo. Suam tong Chin Pastor cu Chin ramkulh Matupi khua in Yangon ah tthawn a si ih, nulepa nei lo tlawng a kilkhawi tlunah Pastor tuan phah in Bible tlawng khalah zirhtu a si.
Mipi Ralkap In Rittheihsi Phur An kai – Sagaing ramthen Tamu myone sung Tamu le Kalay karlak lamzinpi ah mipi ralkap pawl cun rittheihsi phur an kai ih, an urkang sak thluh thu mipi an theihter.
Tamu PDF cun “July 4 , sun nazi 12 hrawngah kannih Tamu PDF cun Kalay le Tamu karlak ih feh keruk nei mawtawpi kan cek ih, mawtaw dunglam ah dipsung ih sanmi thilri kan hmu. a sung kan zoh tikah rittheihsi tamzet a rak um ih, kan laksak hnuah kan urkang thluh. Neta khalah rittheihsi phur hrimhrim cu kan thlah zalen lo ding.
“Ritheihsi tlunah ralhrang tuanpi Mandalay Strong Beer,Mandalay Super Fresh Lager, MEC Myanmar Rice, Moon Dairy Creamer, Myanmar Beer,Myanmar Brewery, Myanmar Premium Beer, Nan Myaing Coffee, Nay Pyi Taw Water,Ngwe Pin Lei Premium Marine Products, Premium Gold le Red Ruby pawl khal kan kham thluh ih, zohman zuar lo dingin le phur lo dingin mipi kan lo theihter zo ruangah a zuar le phur cu a takin kan kai vivo ding a si,” tin thu an suah.
Phekung Doawknak Ah Thi An Tam – Kaya le Shan ramkulh ramri Phekung ih ralhrang sakhan cu July 4, zinglam nazi 5 hrawngah KNDF, KA, Phekung PDF le SSRY pawlin an do ih, khatlam khatlam in thi an tam tin KNDF cun July 6 zingah thu an suah.
KNDF cun “July 4 zinglam nazi 5 hranwgah kannih KNDF, KA, Phekung PDF le SSRY pawlin Phekung ih ralhrang sakhan lak tumin kan do. Sakhan kan lafel zikte tilai ah ralhrang pawl cun ralthuampi thawn nasaten in kap ciamco ih,sakhan lafel thei loin dung kan sipsal.
“Sun hrawngah sakhan lafel thei loin dung kan sipsal ih, doawknak ah kanmah lamin miraltha 11 rori kan can. Doawknak ah ralhrang ralkap 40 hrawng an thi ih, ralhrang hriamhma ngah tampi an um a si,” tin thu an suah.
Sagaing ramthen Wetlet myone ih ralhrang ralkap le mipi ralkap komkhawm pawl doawknak khalah mipi ralkap lam 11 an thi ih, ralhrang ralkap lam 40 tlun an thi tin Wetlet PDF cun july 5 zan ah thu an rak suah ve zo. Wetlet le Phekung ih doawknak cu ralhrang sakhan la tumin do an sinan, ralhrang lamin thuhla an rak theih man tikah sakhan an la ngah lo veve.
Ralhrang 7 An Kai – Kachin ramkulh Phakan myone ah ralhrang palik 7 pawl cu July 6, zinglam nazi 11 hrawngah KIA le PDF tangtlang in ralthuam 4 thawn an kai ngah.
Ralhrang palik pawl cu Kaamaing in Phakan Court ih feh an si ih, lamlak ah PDF le KIA tangtlang in an rak kai. Kaihmi pawl ziangtin an tuah ding timi cu PDF lamin mipi an simthei lo.
PDF thuphuangtu cun “Kan kaihmi pawl cu Phakan palik pawl an siko. Palik 7 kan kai ih, meithal zun 4 khal kan laksak. An thuhla cipciar cu dinhmun ih a zir hrih lo ruangah kan tarlang hrih lo ding. Phakan le Yia karlak ah kan rak kai. Zinglam nazi 11 hrawngah kan kai ih, a tul asile an thuhla cipciar khal kan phuang leh ding a si,” tin media a simthei.
Daw Suh Ih Thuamhnaw Le Thilri An Țhawn Thluh – Ralhrang in Naypidaw thawnginn sungih an khummi Daw Aung San Suh Kyi ih thilri le thuanhnaw pawl khal ralhrang pawl cun Yangon ih Daw Suh Ih inn pakhat ah an kuat thluh zo.
Nipidaw ih Daw Suh Kyi umnak innpi ahcun anmah ralhrang ralkap pawl um an tum thlangih, Daw Suh Kyi thawnginn ih an kuat hnuah a hnen-um le thilri pawl khal Yangon ah an kuat thluh zo.
Buaipitu pakhat cun “July 4 ah Nipidaw ih Daw Suh Kyi thilri zaten Yangon ah an kuat thluh zo. Daw Suh ih hnenum 8 tlunah innsung thilri phunphun le a thuahnaw zaten Yangon ah an kuat. Daw Suh Kyi ih uite khal amah Daw Suh in thawnginn sungih hruai luh rem a tilo ruangah yangon ah an kuat.
“Amah Daw Suh Kyi cu Nipidaw thawnginn sungah an khum fel zo ih, a harhdamnak a tha nan, a eiin a sia tin thuhla kan thei. Ralhrang pawlin Daw Suh ih thilri pawl Yangon ah an kuat thluh zo timi cu thudik rori a si,” tin a sim.
Myanmar ram Democracy ram diktak si dingin theitawk ih zuam rerotu Daw Aung San Suh Kyi cu Democracy a zuamnak ruangah ralhrang ralkap pawlin an kai rero zo ih, a inn ah kiltu nei in an khum theu. Daw Suh cu Insein thawnginn sungah reilote sung thawngthlak a rak si dah
Tu ahcun ralhrang hotu Min Aung Hlaing ih thusuak vekin Daw Aung San Suh Kyi cu Nipidaw thawnginn sungih inn pakhat ah amah lawng an ret ih, thawnginn sung Court ah a thubuai pawl an rel peh ding. Ralhrang cun Daw Suh Kyi cu thubuai 6 hrang kum 11 sung thawngtla dingin hremnak an pe zo ih, thubuai 13 cu Court ah rel peh rero lai an si.
Ukraine Ram Remtha Sal Dingin $750 Billion A Țul – Russia in Ukraine an donak thla 5 sung an lut zo ih, thla 5 sungah Russia cun Ukraine ram sungin innpi tamtuk an kap siat zo.
Russia cun Ukraine ramih khawpi bik Kyiv rori khal bomb zamthei in an rak kap ciamco zo ih, Central Ukraine lam tiang an kap. Thla 5 sung doawknak ah Russia in Ukraine khawpi hrekkhat an lafel zo ih, khawpi lafel lo nan, an kahsiatmi khal a tam tuk.
Hivek a si tikah Ukraine tuah thatsal ding cu a ol nawn lo, $750 Billion lai a cem tul ding tin Ukraine president Zelenskyi cun a relsuak ih, anmah Ukraine ram lawng cun Ukraine tuahthat sal a theih nawn lo thu a sim.
Zelenskyi cun “Tuih dinhmun vek asile Ukraine ram tuahtha sal dingin ram pakhat lawngih tuah a theih nawn lo. Leitlun Democracy ram zaten tangrual ih rem thatsal tulmi a si. Khatlam ah buainak suaktertu cu Russia lam an si ih, Ukraine tuahtha sal dingin Russia khalin tuanvo tampi an nei. Ukraine remtha salnak dingah a malbik $750 Billion tal a tul ding a si,” tin a sim.
Russia cun 2022, February 24 in Ukraine ram a rak do thok. A thok ahcun Russia in Ukraine rampi huapin tthuafai thluh an tum nan, an tum bangin an feh thei lo ruangah tu ahcun Ukraine nisuahnak lam Russia ramri ah ram pahnih ralkap pawl nasaten an do aw.
Ukraine nisuahnak lam Donbas ramthen sungin Luhansk le Donetsk cu Russia in Ukraine an do hlan ihsin zalennak an rak pekmi a si ih, tuitum ah a takin zalenter an tum. Cucu, Ukraine lamin kan ram a si tin an rak duh ve lo ih, an cuh aw rero lai cu a si.
Leave a Reply