Ralhrang Pawl Hakha An Thleng – Sagaing ramthen kalaymyo in Falam ih feh ralhrang ralkap pawl cu July 17 ni ah Chin ramkulh Hakha khawpi an lutih, lamzin tluanah meithal an kap puak vivo phah tin rak hmutu pawl cun an sim.
Ralhrang pawl cu Kalaymyo in an suah ah mawtaw 28 an si tin rel a si ih, Falam in Hakha pan ih, an suah ttumah mawtaw 27 an si tin an sim. Falam le Hakha karlak ahcun mipi ralkap komkhawm pawlin theitawkin ralhrang ralkap pawl an rak do ih, tutiang Hakha le Falam karlak ih ralhrang thizat cu mipi ralkap lamin mipi simtheihnak an nei hrih lo.
Asinan, doawknak ih tel Chin ralkap komkhawm lam cun Hakha le Falam karlak ih doawknak ah ralhrang thi an tam tin an sim ih, a zat cekci lawngte sim dan a bangaw lo ih, Chin ralkap komkhawm khalin thusuah fel an nei hrih lo. Hakha le Falam karlak ih doawknak ah Chin ralkap komkhawm lamin miraltha pahnih an thi ih, CDF Hakha sungtel le Matupi CDF sungtel an si.
Ralhrang ralkap pawl cu Kalay in Falam an panlai ah mawtaw hrekkhat kir an um tin simtu an um ih, Hakha khawpi ahcun ralhrang mawtaw 18 lawng an lut tin rak hmutu pawl cun an sim. Ralhrang ralkap pawl Hakha ih an luh hnuah veikhat bomb a puak nan, thi an um lo tin khua sungih um pawl cun an sim.
Ralhrang ralkap pawl Hakha ah ziang an tuah ding? hmundang ah an feh peh pei maw timi cu zohman in felfai in an thei hrih lo ih, anmah ralhrang lam khalin thusuahmi an nei hrih lo. Ralhrang pawl Kalaymyo in Falam an pan thok ahcun thilphur mawtaw 4 an hruaitel ruangah Lilawn an tuah ding sipei maw? sakhan thar an sak ding sipei maw titu an rak um ih, hrekkhat cun Hakha ih um ralhrang pawl hrang eiin le ralthuam an phurh leh siko ding titu khal an um.
Ralhrang pawl cun lamzin tluan an fehnak ah Falam peng Taal khua in inn 29 an urkang ih, Tlangzar khua in inn 6 an urkang. Hakha peng Chuncung khua in inn 14 an urkang ih, a zaten kom cun ralhrang pawlin lamzin tluanah mipi inn 49 an urkang. Doawknak ih thi ralhrang pawl cu anmah ralhrang nungdam pawlin lamzin tluanah an urkang vivo phah menih, cumi cu mipi ralkap lamin mipi hmuh ah an pholang ve.
A tufang ramsung buainak ih doawknak ah ralhrang pawl cun anmah sungih raldonak ih thi an ralhrangpi pawl ih ruak cu hmunhla ah an thiar hnuaihni paih lo ih, doawknak kiangkap ah an urkang theu men. Hrekkhat doawknak a sosan tikah urkang man lo ih, an tlansanmi tivek khal a um ve.
Falam Ah Ralhrang An Kap Aw – Chin ramkulh Falam khawpi sungah ralhrang palik pakhat cun mipi ka kap a tinan, a ralhrangpi sawn a kap that tin mit hmutu pawl cun an sim.
Falam ih um pakhat cun “July 15 zan ah Falam khawpi sungah puak awn a um timi cu mipi kan zaten in kan rak thei zo ih, ziangruangah puak awn a um timi sawn kha felfai in kan rak thei lo. Asinan, tu ahcun Falam khawpi sungih puak awn a umnak san felfai zetin kan thei lo.
“Pathangkhan veng PCM biakinn lamah ralhrang palik pawl khawsung hel in an vak ih, sim hnuih rak vak suak mipi pakhat an kap. Asinan, ralhrang palik cun mipi a kahnak ah anmah lam duty pakhat a kap ngah ih , a hmunah a let tupti. Hriamhma ngah mipi lamin pakhat cu sizung panpi a si ih, ralhrang palik an kah ngahmi sawn cu a thi.
“Falam khawpi sungih puak awn a suah ruangah ralhrang hmunpi le palik sakhan lam cun meithal an rak kap ciamco ve. Cucu, Falam khawpi sungih puak awn thuhla felfai kan theih dan cu a si,” tin a sim.
Tamu Ih Doawknak Ah Mi 3 An Thi – Sagaing ramthen Tamu khua ah ralhrang ralkap pawlin mipi ralkap lam thianfainak nei an kap ih, Tamu mipi ralkap lamin mi pakhat a thih tlunah khuami pahnih khal hrang pawlin an kap tin Tamu PDF cun thu an suah.
Tamu PDF cun “July 16 zinglam nazi 9 hrawngah hmunram thianfainak kan nei ih, thupten in rak bawhtu ralhrang ralkap le Pyu Saw Htee pawl cun in rak kap. Ralhrang ralkap le Pyu Saw Htee lam mipum 200 hrawng an si ih, doawknak a sosang.
“Doawknak ah mipi ralkap lamin miraltha pakhat kan can ih, ralhrang pawlin an urkang. Ralhrang ralkap pawl cun khuami 2 khal an that ih, mipi hrekkhat khal ralphaw dingih an kaihmi an um. An urkangmi kan miraltha ih ruang cu Kan sakhan lamah kan phur thei ih, a sungte pawl rualin kan riahse tuk. Doakwnak ah meithal zunkhat le cerek mallai kan can a si,” tin thu an suah.
Kalay Falam Lamzin An Tuah Tha Zo – Sagaing ramthen Kalaymyo in Chin ramkulh Falam fehnak lamzin cu ruahsur nasa tuk ruangah July 15 ah lamzin a rak min ih mataw a rak feh thei lo.
A thok ahcun lamzin tuahtu an hmu lo nan, neta ahcun mipi lam tangkhawm cun Lamzin min tlunciah in lamzin thar an huat ih, mawtaw a fehsal thei zo tin mipi an theihter. Lamzin siatnak hmun cu Taingen lanih Falam lam fehnak a si.
Khuami pakhat cun “A thok ahcun tuahtu um loin caan reipi sung lamzin a siat pei maw tin kan thinphang zet. Asinan, ni ziat hman ttul loin July 16 ah lamzin an tuah tha sal ih, feh a theih zo thu mipi in theihter tikah kan lungawi ngaingai a si,” tin a sim.
Matupi Ah Mi 6 An Kai – Chin ramkulh matupi peng Pha Nai khua ah ralhrang ralkap pawl cun CDM tuah sibawi nupa telin khuami 6 an kai.
Kaihmi pawl cu Matupi ih ralhrang bawi thah a si ruangah rinhlelh in ralhrang pawl in an kai tiah khuami pawl cun an sim.
Khuami pakhat cun “Tuih an kaihmi pawl cu Matupi ih ralhrang bawi an kap that timi a thihnak kiangkap ih um an siko. July 15 ni ah matupi ih ralhrang bawi an kap that ih, July 16 ah ralhrang pawlin mi 6 an kai.
“An kaihmi lakah CDM tuah sibawi nupa an tel. CDM tuah sibawi nupa tei pahnih cu zupi an tuah ih, an zuar theu. Cucu, ralhrang pawlin ralbawi Than Naing Win nan pehtlaih tin an kai. Hmuankil pahnih le midang khal an kai bet. Ralhrangbawi han Naing Win cu July 15 ah kah that a si, tin a sim.
AA In Peng Uktu An Kai – Rakhine ramkulh ponna Kyuan uktu U Hla Shwe cu July 17 zanlam nazi 3 hrawngah AA pawlin lamlak ah an kai tin khuami pawl cun an sim.
Khuami pakhat cun “Myone uktu cu Kyukdaw lamah a feh duak ih, Ponna Kyuan a tlunnak lamtluan ah AA pawlin an rak kai. July 1 fangin myone uktu thar ih an ruatmi a si ih, AA pawlin ziangruangah an kai timi cu kan thei ve lo,” tin a sim.
July 16 ah ralhrang ralkap pawl cun Ponna Kyuan ah khuami pakhat bike mawng a cawl duh lo tin an kap ih, a rak kai ve. Ralhrang pawl cun hmatpungtin a neih lo ruangah kan kai tin an sim. Cumi hnuah AA lamin peng uktu an kai ve.
Rakhine ramkulh sung myone tinkim ah ralhrang hnuai ih hnatuan le ralhrang hrekkhat pawl AA in an kaih tikah ralhrang pawlin khuami pawl an kai ciamco theu. Ralhrang in AA ih rinhlelhmi an kaih tikah AA khalin ralhrang lole ralhrang hnuai ih hnatuan tivek an kai ve tivekin khat le khat an tihrim aw ih, an thungrul aw theu.
Ni 2 Peh In Ralhrang Le KIA An Do Aw – Kachin ramkulh phakan myone Sezin khua ah ralhrang ralkap le KIA pawl ni 2 peh in an do aw zo ih, ni hnihnak ahcun ralhrang lamin raldonak vanzam tiang an hmang tin a kiangih um khuami pawl cun an sim.
July 16, zinglam nazi 7 ah Phakan lamin Sezin khua lamih feh ralhrang ralkap pawl cu KIA in an rak kap ih, doawknak a sosan bangin July 17 khalah an do aw peh.
Khuami pakhat cun “July 16 zingin KIA le ralhrang pawl an do aw. July 17 khalah an do aw peh ih, ralhrang pawl cun raldonak vanzam an hmang. Raldonak vanzam cun ralhrang lamin bomb veihnih an thlakih, neta sawn bomb an thlakmi cun khua sungih inn pakhat a tlak siat. Vanzam awn kan theih tikah khuami pawl kan tlan thluh ih, mipi lamin thi cu kan um lo.
“KIA le ralhrang pawl an doawknak hmun cu kan khua in peng 1 hrawng hla ah a si. Kan khua ih ralhrang sakhan khalah an kap aw rero zo. Doawknak a sosang ngaingai ih, doawknak ah ralhrang 30 hrawng an thi tin thuhla kan thei a si,” tin RFA a simthei.
Leave a Reply