Falam ih thleng ralhrang ralkap pawl cu July 7 zinglam nazi 7 hrawngah Falam khawpi an suahsan ih Hakha lam an pan tin Falam ih um mittu pawl cun an sim.
Ralhrang ralkap pawl cu June 29 ah Kalaymyo suahsan in Chin ramkulh saklam rat lut an si. Kalaymyo an suahsan lai ahcun ralhrang ralkap mawtaw 28 an sinan, Falam in Hakha pantu ralhrang mawtaw zat cekci cu simdan phunphun a um. A sinan, ralhrang mawtaw 20 tlun cu an si.
Ralhrang ralkap pawl Hakha an thlen tikah ziang an tuah ding timi cu felfai in theih a si hrih lo. A hlanih ralhrang pawl kalay in Falam ,Hakha an rak feh tikah eiin le ralthuam an phur theu ih, Hakha ah an ret. Hakha ih ralthuam le eiin an ret thluh hnuin an tlungsal theu.
Tuitum ih ralhrang pawl cu thing, rua le thildang phur mawtawpi 4 an hruai tikah Lilawn an tuah ding sipei maw titu khal an um. Hrekkhat cun Saklam Chin ramkulh sungah ralhrang pawlin sakhan an sakbet tum sipei maw titu khal an um. Ziangahtile ,ralhrang pawl cun Kalay in Falam an pannak lamtluan Khuaimual khua kiangah sakhan thar pakhat an rak sak zo.
Tuitum ralhrang pawl Hakha ih an tuah theimi cu Hakha ih um ralhrang hrang eiin le ralthuam phurhsak , Hakha le Thantlang karlak ih timit lilawn tuahsal ding lole sakhan thar saktum an si thei tin mipi cun ralhrang pawl Hakha ih an fehnak san ah thil pathum thleng theimi an sim.
Falam ih um pakhat cun “Tutiang cu ralhrang pawl Hakha lamah ziang an tuah ding timi a san felfai kan thei hrih lo. Ziangahtile , mipi ralkap lam in siseh anmah ralhrang pawl khalin Hakha an fehsan an phuang hrih lo. Ralhrang mataw pawl cun Falam khawpi cu an suahsan zo ih, Hakha lam cu an pan rori ko. Ralhrang mawtaw 20 tlun cu an si,” tin a sim.
Kalay Tilian Ah Chinmi A Thi – Kalaymyo thlanglam Tayakung khua kiangih tilian ah Chinmi pakhat a pil ih ,mipi in a ruang an hawl peh rero lai.
Chin ramkulh Falam peng Munpi khawmi Pa Dam Lian Sang cu an khua in Kalaymyo ah a feh ih, July 6 ah tilian ah a pil. Tiva lian ruangah kiangkap lo pawl khal ti a khat theh ih, Pa Dam Lian Sang khal tilian ahcun a pil.
July 6, zanlam tiang a ruang an hawl hmu thei hrih lo ih, tuini July 7 lamah a ruang an hawl peh nan, thuthang kan phuan tiang a ruang an hmu thei hrih lo.
Tuini July 7, zinglam nazi 10 hrawngah Kalaymyo Tuangphila kauh-kuan zin le Naypidaw wan-htan umnak karlak ah ralhrang ceknak hmunah bomb 2 a puak.
A kiangih um pakhat cun “Bomb a puak hnuah ralhrang 30 hrawng an thleng. Cumi hnu reilo ah bomb a puak betih,a kiangih inn sangkate mallai a siat. Bomb puak ruangah ralhrang cun kiangkap mipi kaihmi an nei. Zopawl in bomb an puah ti cu kan thei lo,” tin a sim.
Ramsung Khualtlawn A Har Deuhdeuh – Ralhrang in rampi thuneihnak an lak hnuah ramsung hmun tinkim in khualtlawn sukso a har deuhdeuh ih, lamzin ah ceknak a tam tuk tin khualtlawng pawl cun an sim.
Mandalay in Yangon feh ding pakhat cun “A hlan ahcun Mandalay le Yangon cu olsamten kan thleng nan, tu ahcun a ngah nawn lo. Buainak pibik cu mawtaw sukso rengreng ralhrang pawlin an dingter thluh ih, mawtaw sungih to zaten pakhat tetein hmatpungtin an cek.
‘Cutikah mawtaw tampi an tlar aw man ih, mawtaw tlar aw zaten ralhrang pawl cun pakhat tetein an cek tikah caan a rei tuk. Hivek an fehpi ringring ahcun khualtlawng dingah a hlankhan nikhat in feh cia a tul siko. A hlanih nikhat thlen theih cu tuvek dinhmun in ni 2 caan pek tul vek a si,” tin a sim.
Yangon ih um Chinmi sumdawng pakhat khalin “Yagon in peng 115 karlak lamzin vial hmanah hmun hnih rori ah Hmatpungtin mi an zohsak duh ruangah motor hmuahhmuah Cumkheng hnakih fungin nazi tamzet muang tete ih tthawn kerhko a tul. Motor tlar aw cu a sautuk ih hmuh ban a silo. Yagon ih traffic jam kan timi cu a rak tawituk lam.
Nikhua a sa tukih aircon lole a ollo tikah Datsi khat thepthep ih ready a tul, Cucing hmanin a ol lo. Hmanhlap ding cun a hlan nikhat ih feh cia a tul ding a bang. Cuhman in a ollo men ding,” tin a tarlang ve.
NLD Palai A Ruang In An Hmu – Mon ramkulh Bilin myone NLD palai cu ralhrang ralkap pawlin June 22 ah an rak kai ih, July 6 ah Bilin NLD palai Kyaw Myo Min ih ruak cu karen ramkulh Hba-An myone khua pakhat ah an hmu.
“A ruang zohfel a si tikah U Kyaw Myo Min a si tin kan nemhnget zo. A kut pahnih a dunglam ah an khit ih, cuti cingin a thi. July 6 sun hnuah a ruang an hmu ih, a taksa ahcun meithal kahnak hriamhma a um lo.
“Ralhrang pawlin an kaih hnuah thuhla tampi an sut dingih a theih lomi pawl cu ka thei lo tin a let ding. Cutikah ralhrang pawl an thinheng ih, an that in a lang. A kut an khih hnuah a hrem that ih, tikawng ah a ruang an hlon men. Amah a si in kan nemhnget zo a si,” tin a sungte pakhat cun a sim.
U Kyaw Myo Min cu NLD party sungtel dang pahnih le khuami pakhat thawn June 22 ah ralhrang ralkap pawlin an rak kai. Kaihmi 4 lakin mi pahnih ruang khal July 2 ah Hpa-An Myone Minsaw khua ah khuami pawlin an rak hmu zo ih, U Kyaw Myo Min ih ruang khal Minsaw khua kiang thotho ah khuami pawlin a ruang an hmu.
Ralhrang in khuami pakhat an kaihmi cu a tlansuak man ih, tlansuak pa ih rel dan vek asile midang pawl cu an tlansuah an phan ruangah ralhrang pawlin an ke an vuak kiak tin a sim. Ralhrang in rampi thuneihnak an lak san ah NLD vote dik lo an puh ih, thuneihnak an lak hnu khalah NLD party le tantu pawl an kai rero ih, a hrem thatmi an tam hnuaihni thlang.
Myaung Ih Doawknak Ah Ralhrang 21 An Thi – Sagaing ramthen Myaung myone sungah ralhrang ralkap le mipi ralkap komkhawm pawl July 6, zinglam nazi 8 ah an do aw ih, nazi 1 sung doawknak ah ralhrang 21 an thi tin mipi ralkap komkhawm lakih tel Chuang Oo Revolution Army in thu an suah.
Chuang Oo Revolution Army cun “Zinglam nazi 8 hrawngin kan do aw ih, doawknak ah ralhrang 21 an thi. Ralhrang 15 hrawng hriamhma ngah an um bet. Ralhrang thi lakah tatyin-hmu , bothum, bohnih le bokhat pawl an tel. Kan doawk theh hnuah ralhrang lam cun Helicopter an hmangih, kannih cu kan himnak hrang dung kan sip.
“Kannih hmundang in va feh pawl cu ralhrang Helicopter a thlen tikah dung kan rak sip thluh zo ih, a hmunram sungih mipi ralkap pawl lawng an um thlang. Mipi ralkap lamin pakhat cu ralhrang kahmi ralthuampi in a ngah ih,hriamhma naa tuk a ngah. Reipi doawk kan tlin rih lo ruangah kan himnak hrang dung kan sip.
“Tuhrih ahcun ralthuam le mipum ah kan thlau aw tuk lai. Cutikah an manlo laiah bomb kan puah ih kan kap ciamco theu. Cuvek caan ah ralhrang thi an tam thei ngaingai ih, kannih PDF hrang khalah kan himnak bik a si. Cuti siloin hmaiton ih doawknak le reipi doawknak cu kan hrang a him hrih lo,” tin a sim.
Ralhrang Pawl Tipar Raldo An Zir – Ralhrang ralkap lakin tipar ralkap le tlunsang ralkap pawl cu July 5 ah raldo zirnak an nei ih,raldo an zir lai cu ralhrang hotu Min Aung Hlaing khalin a thlir ve.
Ralhrang hotu Min Aung Hlaing cun “Kan ram tivapi pawl kan kilkhawi that a tul ih, cumi kilkhawi tha dingin zirnak nei an si. Tipar ralkap tha tuk kan neih a tulih, cupawl cun kan ram tivapi pawl an kilhim ding. A hleicein sumpai tuahnak ih kan hmanmi tipi pawl cu midang le ramdang ih cuhbuai theih loin kan kilkhawi that a tul a si,” tin a sim.
Asinan, tuih dinhmun ah Myanmar cu ramdang thawn buainak an nei lo ih, tipi thu khalah ramdang thawn cuhawk buaimi an nei lo. Cutikah ralhrang pawl Rakhine tipi ah raldo an zir timi cu ramsung buainak hrang a siko tin Myanmar ram thuhla theitu pawl cun an sim ve.
Myanmar ram thlirtu U Phi Than cun “Ralhrang lam cun rampi humhimnak hrang raldo kan zir tin an rel nan, an cangvaih dan zoh tikah cuvek hrang a silo. Ramdang thawn khalin ziang buainak hman an nei lo. Hivek ih raldo an zir dan khal ramdang do thlak an si lo. A tufang Rakhine tipi tlunah doawknak a um ih, cumi hrang timtuahnak nei an siko ding,” tin a sim.
Ralhrang raldo zirnak ahcun tisung lut lawng pahnih, lawng dangdang le Helicopter pawl an hmang ih, July 1 in ni 5 tiang Ni 5 sung raldo zirnak an nei. Raldonak zirnak cu peng 13 tluk sau tipi ah nei an si.
Rakhine ih um pakhat cun “Tuvek in ralrang pawl tipar ah raldo zirnak an nei timi cu ramdang ruangah a silo, Rakhine ah China thawn tuantlangnak an nei ih, cucu kilhimsak an tum siko. A tufang AA le ralhrang karlak boruak a that lo tikah an kap aw asile China sumdawnnak tibuai lo dingin ralhrang pawlin humsak an tum a si,” tin a sim.
China Khawpi Xian An Lockdown Sal – China ram Shannxi ramthen thlanglam Xian khawpi cu covid 19 natnak ruangah an khawpi lockdown a si thu mipi an theihter.
Xian khawpi thuneitu pawl cun ni 3 sungah covid 19 nat nei tampi an hmu ih, hrekkhat cu a takin taksa ih langsuak le hrekkhat cu taksa ah langsuak lo nan covid 19 natnak nei an si tin an sim. Ni 3 sungih covid 19 natnak nei an hmuh tam tuk ruangah Xian khawpi cu zarhkhat sung lockdown thu an suah.
Lockdown thu an suah rualin vantlang mipi umkhawmnak tlawnginn, rawldawr, Gym ,Bazar le tlangsuak innpi tivek pawl khal an kharter thluh. Vantlang inn an khartelmi ahcun pawlkom inn le tar upa kilkhawinak inn pawl khal an kharter thluh.
Khawpi sungih um mipi zaten covid 19 natnak an neih le neih lo an cekter ih, covid 19 daan khoh zetin an fehpi hngal. A tufang China ramsung hmun tamsawn cu lockdoawn a um nawn lo nan, Xian khawpi cun covid 19 natnak an tuar hleice ih, 2022 April thla khalah khawpi an rak lockdown zo. June thla sungah lockdown an phelh man tilai ah July thla thokin lockdown thu an suah lala ih, zarhkhat sung zohfelnak an neih hnuah Lockdown peh le peh lo ding thu mipi an theihter leh ding tin khawpi thuneitu cun thu an suah.
Leave a Reply