Ralhrang In Timit Bomb An Thlak

Ralhrang In Chinram Bomb An Thlak – Chin ramkulh Hakha peng Timi hmunram sungah ralhrang cun raldonak vanzam pahnih in bomb veithum an thlak tin mit hmutu pawl cun an sim.

Hakha le Thantlang karlak Timit hmunram ah CNA le CDF pawl an um bangin ralhrang pawl khal an um ve ih doawknak a um deuh ringring. November 7, sun nazi 2 hrawngah Timit hmunram sung cu ralhrang raldonak vanzam pahnih in bomb 3 an thlak ih, an zam kirsal. Timit lilawn cu 2021, October 21 ah mipi ralkap lamin ralhrang pawl thilri thiar thei hlah haiseh tin an rak bomb siat ih,2022 September 24 ah ralhrang pawl cun Timit lilawn an don thasal.

Ralhrang pawlin timit lilawn an don thasal hnu ahcun ralhrang pawl cu Hakha in Thantlang lamah an feh ih, cucu CNA le CDF in lamzin tlunah an rak kham. Ralhrang pawl cu Timit lamzin tlunah umhmun a nkhuar phah vivo ih, mipi ralkap pawl thawn an do aw peh rero. Kan dungih an doawknak khalah CDF pakhat le CNA pathum an nunnak a rak cem.

Khuami pakhat cun “Mi pakhat hnih menih theihmi le hmuhmi a silo. Kiangkap mipi in kan thei thluh ih, a hmutu tampi kan um. Ralhrang raldonak vanzam pahnih cun timit hmunram sungah bomb vei 3 an thlak ih, anmah cu an zamhlo sal. Bomb puak ruangah mipi ralkap lamin thi an um maw timi cu felfai in kan thei hrih lo. Anmah mipi ralkap lamih thusuah ding kan hngak hrih. Kannih kiangkap ih um hrang ahcun a ring tuk lawmmam ih, tih a nung ngaingai a si,” tin a sim.

Ralhrang ralkap cun October 31 in November 6 tiang Chin ramkulh Hakha peng, Thantlang peng le Falam peng pawl vanzam in a rak hel rero zo ih, November 7 ahcun ralhrang raldonak vanzam pahnih cun a takin Hakha peng Timit hmunram ah bomb an thlak. Boruak a sosang zetih doawknak suak thei ringring a si tin an sim.

Mithat Thubaui Nei Ralkap Ih La Ding Russia – Russia president Putin cun mithat, rukru le rittheihsi ruangih thawngtla pawl Russia ralap dingah la dingin hminkhen a ngan fel.

Thubuai nei ralkap ih an lakluh dingmi ah sualpi thubuai nei le cozah eiruknak ruangih thawngtla tivek cu an tel lo thung. Russia in Ukraine an do hnuah ralkap an tul zetih ralhrang thar ting 3 tlun labet tum an si. Kan dungah Putin cun Ukraine ah Russia ralkap an kuat bet ding thu a rak sim zo.

Russia in thla 10-nak Ukraine an domi ah Russia ralkap tampi an theih phah ve ih, ralthuam khal tampi an cem. Cumi ruangah Russia cun ralkap thar an tul ih, misual , mithat le rukru ruangah thawngtla pawl cu ralkap ah lalut in Ukraine ah an kuat tum men.

Hivek zoh tikah Russia in Ukraine an do peh vivo hrih dingin a langih,ram pahnih buainak ziangtik tiang a awh ding tikhal rel theih a silo. Khatlam ah US le Nato pawlkom cun ralthuam in Ukraine an bawm rero ve ih, neh aw taktak um loin an do aw rero men.