Chin ramkulh Mindat peng sungah ralhrang ralkap le CDF Mindat pawl June 29 ni ah an do aw ih, doawknak ah ralhrang 4 an thi tin CDF mindat cun thu an suah.
CDF Mindat cun “June 29, zanlam nazi 2 hrawngah kannih CDF Mindat le ralhrang ralkap pawl kan do aw ih, doawknak ah ralhrang pakhat a thi ih, hriam ngah tampi an um. Zanlam nazi 3 hrawngah ralhrang pawl thawn kan doaw sal ih, ralhrang 3 an thih tlunah hriamhma ngah tampi an um bet.
“Kannih CDF Mindat lam khalin kan miraltha pakhat cu ralhrang kahsuakmi ralthuampi in a ngah ih, dung kan sip laiah lamlak ah a nunnak a cem. Kan miraltha pakhat dang khal hriamhma a ngah nan, a bese tuk lo.
“Htilin lamin Mindat lam pan ralhrang ralkap pawl cu Palung Twe khua ah zan an riak. Kannih Mindat peng sungah doawknak a sosang sinsin thei ih, kan tulsammi ziangkim ah in bawm vivo dingin mipi kan lo sawm a si,” tin thu an suah.
PDF Hrang Suithi le Suifaute An Pe – Sagaing ramthen Tamu peng sungih cangvai PDF tamu hrang innsang khat cun suithi le suifaute ting 74 man an pe ih, midang khal PDF hrang siang takin pe dingin an sawm ve.
Tamu PDF hotu pakhat cun “Kanmah in duhdawttu innsang khat cun suithi 2, sui faute 2 le sui hnakaih khuakhat pawl in pe. A zaten ting 74 a man ding. Kannih in sui hnakhaih, faute le suitthi pawl cu Online in kan zuar dingih, mipi pawl in leisak dingin kan lo sawm a si,” tin mipi sawmnak a nei.
Petu Insangnu cun “Keikal nunau ka si ih, ka hruh duh tukmi hlir an siko. Damlo caan khalah zuar duak a theih ringring. Asinan, mai hmailam lawng ruat loin kan zaten hrang ruatin pe kan si,” tin a sim.
Manipur Ah Myanmar Rammi 80 An Kai – India ram manipur State Churachandpur khua , Ngathal khua le Imphal khua pawlah Myanmar rammi 80 kaih an si.
June 28 ah Manipur palik pawl cun Inn tin lutin Myanmar rammi pawl an cek vivo ih, Churachandpur khua ih inn pahnih in mipum 40, Ngathal khua le Inpha khua in midang hrekkhat tin Myanmar rammi pawl an kai.
An kaihmi Myanmar rammi pawl cu India rammi sinak nei lo hlir an si ih, thiamtah ih hlawh aw le thilzuar ih hlawh aw an si. Kaihmi mipum 80 lakah nauhak 20 hrawng an tel. kaihmi tamsawn pawl cu Sagaing ramthen sungih doawknak ruangah thupten Manipur ramthen sungih tlan an si.
Kaihmi pawl buaipitu pakhat cun “India ramsung khalah State tin cangvaih dan a bang aw lo. Mizoram ahcun Myanmar raltlan pawl in ngaihsak tukih, kan umnak ding le eiin ding tiang in tawlrel sak. Damlo caan khalah zohawknak sikhan tiang din zo a si.
“Manipur ahcun Myanmar raltlan pawl cu a relh in an relh rero ih, an him lo lawlaw. Tuitum lawng a silo, kan dung khalah Myanmar raltlan pawl an rak kai rero zo. Manipur State cun Myanmar mipi in dinpi lo ih, raltlan pawl khal an state sungah umter in siang lo a si,” tin a sim.
KIA Le PDF In Ralhrang 5 An Kai – Sagaing ramthen Bamauk myone ih doawknak ah KIA le PDF cun ralhrang ralkap 5 nungdam in an kai ngah ih, doawknak ah ralhrang 5 an thi tin Bamauk Revolution cun thu an suah.
Bamuak Revolution cun “June 28 zanlam ihsin June 29 zinglam tiang Simaw le Taungkyi kiangah kannih Bamuak PDF, KIA, Katha PDF le Indaw PDF pawlin ralhrang ralkap kan rak do ih, ralhrang 5 an thih tlunah ralhrang 5 nungdam in kan kai ngah. Ralhrang thi le kan kaihmi pawl hnenin ralthuam hrekkhat kan laksak thei ih, kannih lam kan him.
“kan kaihmi ralhrang pawl cu leitlun ralkap daan vekin thaten kan khum. Kan kaihmi ralhrang siseh, ralthuam tlunah ralhrang thi pawl ih sulhnu cu kan himnak dingah kan tarlang hrih lo ih, neta remcang ah kan tarlang leh ding a si,” tin mipi an theihter.
Sagaing ramthen le kachin ramkulh ramri Bamauk kiangkap ah KIA le PDF tangtlang cun June 20 lamin ralhrang ralkap an do rero zo ih, ralhrang lam thi an tam nan, ralhrang lam an finkhawmawk rero ruangah doawknak a um peh ringring lai.
Doawknak Ah Ralhrang 14 An Thi – Tanintharyi ramthen Tayet chaung myone ah ralhrang ralkap le mipi ralkap pawl ni 2 sung an do aw ih, ni 2 sung doawknak ah ralhrang 14 an thi tin PDF cun thu an suah.
Tayet Chuang PDF cun “june 24 ah ralhrang mipum 50 hrawng cun kan hmunram lam in ra pan ih, kannih mipi ralkap pawl thawn kan do aw thok. June 24 ih kan doawknak ah ralhrang 4 an thi ih, ralhrang 3 in hriamhma an ngah. Kannih mipi ralkap lam khalin pahnih an thi ih, pakhat in hriamhma a ngah ve.
“June 26 ah ralhrang ralkap pawl cun mipi inn 3 an urkang ih, dung an sip zawngah kannih mipi ralkap pawlin kan kap. Mipi inn urkangtu ralhrang ralkap pawl cu kannih mipi ralkap pawl in lamzin ah vei 2 kan rak do ih, vei hnih kan doawknak ah ralhrang 10 an thi. Neta sawn vei 2 kan domi ahcun kannih mipi ralkap lam kan him ih, ralhrang 10 an thih tlunah ralhrang 7 in hriamhma an ngah.
‘Ralhrang ralkap pawl cu TYC PDF, Dawei PDF, TyC , Freedom fighter le kannih Tayet chaung PDF pawl in kan rak do a si,” tin thu an suah.
Yangon Ih KTV A Kang – Yangon ramthen Aloe myone tittaw vengih Skyway Club & KTV cu June 29, zan nazi 10 hrawngah a kang ih,Zan nazi 11 hrawngah an mit thei.
Tutiang cu ziangtin Skyway Club & KTV a kang timi theih a silo tin Yangon mitat cun thu an suah. Skyway Club & KTV cu ralhrang hnenah siah pe an si tlunah ralhrang beer le zu zuar an si ih, mipi ralkap pawl cun ralhrang tuanpi lo dingin vei tam tuk ralrinnak an rak pe zo.
Bomb puah tiangin vei tampi ralrinnak pek rero an si zo nan, ralhrang an tuanpinak an bansan cuang lo ih, tuvekin siat an tong. Siat an ton thu ah mipi ralkap lamih thusuak zianghman a um hrih lo ih, inn a kang san bik theih a si hrih lo.
Leave a Reply