Southeas ASIAN Games tin hmin an pekmi SEA game 2022 cu Vietnam ram ah tuah rero lai a si ih, Myanmar aiawh in feh Chinmi pahnih khalin pakhatnak laksawng sui tacik an ngah ve.
SEA Games ah Myanmar aiawh in pakhatnak laksawng ngahtu mi pahnih cu Paletwa ih um Salai Aih Soe Lin le Kanpetlet ih um Salai Mana Kui tei pahnih an si. Laksawng an ngahnak cu Vietnam hnam sualawknak cikhat lu thuam cingin kut le ke hman theih mi 4 a bur ih sualawknak ah a si.
SEA Games 2022 ahcun inntek Vietnam in Gold Medal 165 an ngah zo ih, Gold medal ngah tambik an si hrih. Myanmar khal Gold Medal 8 an ngah ve thei. SEA Game 2022 cu may 12 ah an rak thokih, may 23 ah theh ding an si.
SEA Game ih tel Myanmar aiawh pawl cu ralhrang kuthnuai ih feh an si tikah hrekkhat cun dothlengnak ah nan tel lo, mipi lamtang nan silo tin lungawipi thei lo an um ih, Chinmi lak khalah SEA Games ih laksawng ngah ban Chinmi pahnih an sunloih dan a bangaw lo.
Doawknak Ah Ralhrang 3 An Thi – Tanintharyi ramthen Myeuk district Tarahbuan khua kiangah ralhrang ralkap le mipi ralkap pawl may 20, zinglam nazi 9 hrawngah an do aw ih, zanlam nazi 3 tiang nasa ten an kap aw tin PDF cun thu an suah.
Ralhrang ralkap in PDF pawl umnak an theih tikah thazang tam zetin PDF pawl umnak an pan ih,cumi ruangah nasa ten do aw an si. Ralhrang ralkap cun ralthuampi 80 tlun an kap ih, PDF sakhan pakhat an siatsak thei. Doawknak ruangah kiangkap khua mipi 5000 lenglo cu khua ah um ngam loin hmunhim ah an tlan phah.
PDF hotu cun “Ralhrang pawlin kan sakhan umnak an thei ih, sakhan la dingin in ra pan siko. Mipum le ralthuam a thlau aw tukih, kannih cu dung kan sip. Ralthuampi le ralthuam dang duhtawk in a hmangih, kan sakhan pakhat cu in siatsak thluh.
“Doawknak a um tinten mipi tuar ding zawngin ralhrang pawl an cangvai hrim ih, mipi umnak tiangah ralthuampi an kap. Cumi ruangah mipi tamzet khua ah um ngam loin an tlan phah. Dungsip phah in ralhrang kan donak ah ralhrang 3 cu an thifel rori in kan hmu. Kannih lam khal hriam ngah cu kan um ve,” tin media a simthei.
Khuami pakhat cun “Doawknak a um tinten zinagruangah khuami pawl nan tlan tin thusuhnak nei hrekkhat an um. Cupawl cu sim duhmi ka nei. Tlan loin khua ah daiten um ngam ding ci asilo, ziangahtile ralhrang pawl hi thluk fim khawl an nei nawn lo ih, an duhmi pohpoh PDF ah an puh, an kap that , an kai men. Curuangah kan nunnak humhimnak hrang tlan kan si,” tin a sim ve.
Ralhrang In PDF Donak Ah Vanzam An Hmang – Sagaing ramthen tanse le Minkin myone ah ralhrang ralkap cun PDF pawl an um tin vanzam le Helicopter an hmangih hnuailam an kap. Rinhmang thumen ah ralhrang cun may 20, sun nazi 12:30 in vanzam an ahmang thokih tlunlam in bomb 8 tluk an thlak. Cumi hnuah Helicopter 3 an zam betih, minute 20 sung hnuailam an kap.
Mit hmutu pakhat cun “Tuini cu poimawh ah ka rak vakih, ralhrang vanzam le Heilicopter cu ka mithmuh rori an si. Tlunlam in bomb an thlak ih,minute 20 sung tluk an rei. Bomb an thlaknak hmun cu khua sung a silo ih, hramlak PDF pawl umnak tin anmah ralhrang lam cun an sim. Ralhrang pawl domi bik cu Tanse PDF le Yi Oo PDF an si.
“Asinan, hmunram kautuk thupi a si ih, ralhrang in vanzam le Helicopter an hmang ciamco nan, PDF pawl umnak an kap ngah lo. Mit ih kan hmuh dan vek asile vanzam pakhat le heilicopter 3 an si. Hivek ruangah kiangkap khua naivai pawl cu hmunhim ah an feh sung. Ralhrang ih bomb thlakmi ruangah thi le hriam ngah zat cu felfai in kan thei hrih lo a si,” tin a sim.
Mandalay Palik Sakhan An Kap – Mandalay ramthen Sinku myone Shwepi palik sakhan cu may 20, zinglam nazi 1:30 hrawngah Mandalay PDF in an kap ih, ralhrang 5 an thi tin The King Peacock cun thu an suah.
Palik sakhan ih doawknak ah palik 3 cu a hmun rori ah an thi ih, palik 2 dang cu sizung fehpi an sinan, an hliamhma naa tuk ruangah sizung ah an thi tin PDF lam cun an sim. Palik sakhan bawm dingin feh ralhrang ralkap pawl khal lamlak ah bomb an puah ih, ralhrang 3 an thi tin PDF cun an tarlang tel.
The King Peacoak hotu cun “Zinglam nazi 1:30 ah Shwepi Palik sakhan do kan si. Minute 20 hnuah dung kan sipsal. A hmunah ralhrang palik 3 an thi ih, sizung ah palik 2 an thi bet. Palik 5 an thi timi cu kan fiah thei zo. Dung kan sip hnuah Mandalay lamzin tluanih bomb kan kammi cu ralhrang pawlin an thei ih ,phelh an tum tikah bomb a puak ih,ralhrang 3 an thi.
“Sun nazi 12 hrawngah mitat tiang telin ralhrang pawl cun kiangkap thianfainak an nei ih, bomb puak betah mitat 2 khal an thi. Cuvek a si hnuah ralhrang pawl cun an rualpi thi pawl ruang lak an tumih, culai fangah bomb kan puah bet. Cumi khalah ralhrang 12 hrawng an thi. Kanmah lawng siloin Mattaya PDF le Sinku PDF pawl thawn PDF komkhawm 3 in ralhrang do kan si,” tin Khittit a simthei.
Bank Kiltu Ralhrang An Kap – Makui ramthen Pakukko khua ih myanmar sipuasi bank kiltu ralhrang pawl cu PDF in may 20 zanlam nazi 3 hrawngah an va kap ih, ralrhang 4 an thi tin Pakokku PDF cun thu an suah.
PDF pawl cu mawtaw sungah meithal ralring cia thlepthlep in an um ih, bank hmai an thlen zawngah mawtaw sung cun bank kil ih ding ralhrang pawl duhtawk in an kap ciamco. Duhthusam ih an kahmi ah ralhrang 4 an thi man in an sim ih,cumi hnuah an tlan cih. PDF in bank kil ralhrang an kah laiah bank ah mipi an um lo caan a si tin an tarlang tel.
PDF pawl dung an dip caan ah an mawtaw pakhat hman tlak loin a siat ih , mawtaw an tlansanmi ahcun meithal 2 le cerek hrekkhat an tanta. Cumi cu ralhrang lamin an pholang ih, doawknak ah PDF lam ralthuam le mawtaw kan tanta nan, thi cu kan um lo tin thu an suah.
Leave a Reply