Chin ramkulh Matupi Peng sung hmun pakhat ah CDF matupi sungtel pakhat a damlo ih, theitawk in an umnak hmunah an tuamhlawm rero nan, sivai haidaih lo ruangah a nunnak a cem tin matupi CDF cun mipi an theihter.
Matupi CDF cun “June 4 ah kan sungtel pakhat cu damlo in a buai thok. Theitawk in kan tuamhlawm rero nan, sivai haidaih lo ruangah a nunnak a cem. Kannih cun in tansantu miraltha cu upatnak kan pe ih, a sungtel rualin kan riahsiatnak kan langter a si” tin thu an suah.
Fur caan kan thlen zo bangin ruah a cen ,natnak a tam ngaingai. Ahleice in hramlak ih umpawl in fur caan natsia an tuar cuang. Myanmar ram buainak ruangah mipi ralkap pawl le raltlan pawl cu hramlak umhmun khuar tlangpi an si.
Ralhrang In Tamu Le Kalay Ah Mi 4 An Kai – Ralhrang ralkap cun Tamu le Kalaymyo ah ralthuam thawn mi 4 kan kai tin thu an suah. Ralhrang kaihmi pawl cu Kalaymyo ih um pakhat le Tamu ih um pathum an si.
Ralhrang cun “Thuhla kan theih dan vekin June 3 ah Kalaymyo Tahan veng ceknak kan nei ih, lalnunmawia cu ralthuam thawn kan kai. Lalnunmawia cu PDF hrang cerek leitu a si tin heknak kan dongih, Lalnunmawia hnenin cerek tampi kan kai ngah.
“June 5 zan khalah thuhla kan don dan vekin Tamu ah ceknak kan nei ih, CDF thawn pehtlaih aw mi 3 kan kai. Daw Cin Nu inn kan cekih, a fanu Pan Wa le Thang Lan Pau khal an rak um. Than Lang Pau cu kalaymyo ih um a sinan, Tamu ah kan kai ngah. Daw Cin Nuh inn sungin bomb phunphun tlunah phone le thildang neuhneuh kan kai ngah a si,” tin thu an suah.
Thailand Ah Rohingya 59 An Kai – Thailand thlanglam Satun peng sung tipi kapah Rohingya mipum 59 umkhawm kan kai ngah tin Thailand palik pawl cun thu an suah.
Thuhla an suh fel tikah Rohingya mipum 59 pawl cu Myanmar le Bangladesh ram in thupten Malaysia lut tum an si. An zaten mipum 178 hrawng an si ih, lawng 3 an to. Lawng 2 cu Malaysia ram sung an lut man zo nan, Malaysia palik pawlin an rak kai ve. Malaysia lut man hrih lo,lawng pakhat ih um Rohingya mipum 59 pawl khal Thailand palik pawlin an kai ngah ve.
Myanmar in thupten Malaysia lut tum pawl cun puaisa hnenah ting 30 kyats an pek thu an sim. Thailand palik in Rohingya mipum 59 an kaihmi pawl cu thupten ram sung lut thubuai hmangin an khum thluh.
Malaysia cun Passport in Myanmar hnatuan a ko nawn lo hrih ih, hivek ruangah Malaysia feh duh pawl cu thupten leihnuai ih an feh theu. Leihnuai ih feh lakin tluangten thleng thei an um nan, a hmun an thlen khalah thupten hnatuan , Malay Palik tih ih caan hman tul thotho a si.
Rohingya pawl hrimhrim cu leitlun in umnak hmunhnget an nei lo tin an hnon reromi an si ih, ziang ram khalin an cohlang duh lo. India in kan rammi an silo an ti ih, Myanmar khalin kan rammi an silo an ti ve. Bangladesh khalin kan rammi an silo an ti. Hivek ruangah Rohingya pawl cu sukso an fehkual rero ih, tufang cu thupten Malaysia pan tum an tam.
Thailand Palik bawi cun “Kaihmi lakah nauhak khal an tel. Ni 5 sung rawl kan ei lo an ti ruangah zamrang ten an ei ding kan hawl ih kan pe. Tu ahcun daan lo ih ramri lanin kaih an si ruangah a tul dan vekin an tlun thu rel a si ding. Cumi hnuah hremnak pekmi pawl cu hremnak an pek bangin an tuar dingih,an ratnak ram ah kuat kirsal khal an si thei,” tin a sim.
Li Ke Kaw Raltlan Pawl An Tlung Ngam Hrih Lo – Karen Myawaddy myone Li Ke Kaw doawknak ruangih raltlan pawl cu thla 7 hnu khalah an khua ah an tlung ngam hrih lo.
Li Ke Kaw hmunram cu 2021, December thla thokin ralhrang ralkap pawl cun PDF le NUG palai pawl an um tin an rak do ih, khat le khat an do aw ciamco. Thla reizet sung nasa ten an doawk ruangah mipi pawl cu khua ah um ngam loin tlan thluh an si.
2022, June 5 ahcun Karen ralthuamkai BGF le DKBA pawl raltlan umnak hmunah an feh ih, raltlan pawl inn khat ah pakhat meeting kai dingin an theihter. Cumi ahcun nan khua ah tlung uhla, hnatuan uh. A kelten va um uh tin an sim thei nan, raltlan pawl cun doawknak a reh fel hrih lo ruangah kan tlung ngam hrih lo, kan him hrih lo tin an rak sim.
Raltlan pakhat cun “Kan lo kil ringring ding ,nan himnak hrang tuanvo kan la ding tin in tiam lo nan, tlung uh in ti men. Lo lakah bomb kammi tivek a um, bomb puak hrih lo tampi a um. Cuvek pawl in thianfai sak hmaisa dingin kan dil ih, cuvek a um mawsi an ti men. Curungah, kannih cu kan tlung ngam hrih lo , lo hna khal kan tuan ngam hrih lo a si,” tin a sim.
Ralhrang Lawng 3 An Kap – Kachin ramkulh Shwe Gu khua in Ayeyarwaddy tipi fehnak tipi ah ralhrang lawng 3 an fehkhawm ih K PDF in an kap. Ralhrang lawng fehkhawm an kah tikah lawng pakhat a siat fel tin K PDF cun thu an suah.
K PDF hotu cun “Ralhrang lawng 3 an fehkhawm ih, ralring zetin kan bawh hnuah kan rak kap. Ralhrang lawng 3 lakin pakhat cu kan kap siat rori ih, ralhrang thi an um ding nan, a zat kan fiah thei lo. Neta ahcun ralhrang pawl in an lawng in ralthuampi thawn in kap ciamco ih, mipi umnak khua an naih. Cutikah kannih khal mipi an tuar ding kan phang ih, dung kan sip.
“Ralhrang pawlin ralthuampi thawn in kap ciamco nan, kannih PDF lam cu thi um loin dung kan sip. Ralhrang pawl cun doawk laiah mipi umnak khua khalah ralthuampi an kap. Asinan khua mipi lakin thi le hriam ngah an um thu kan thei hrih lo. Ralhrang lawng 3 cu bomb 4 in kan puah ih, cumi hnuah meithal in kan kap.
‘Neta ahcun ralhrang thazang tamsawn an cah betih, lamzin sukso pawl nasa ten an cek. Tu ahcun ralhrang cangvaih dan kan thlir hrih. Caan remcang a um tikah ralhrang lawng kan kap bet ding. Ziangatile hmundang ih ralhrang pawl hrang ralthuam le eiin phur an si,” tin a sim.
PDF Komkhawm 19 In Ralhrang An Do – Sagaing ramthen Chuang Oo Myone Kanzi khua kiangah PDF komkhawm 19 cun ralhrang ralkap an do ih, ralhrang 20 lenglo an thi tin thu an suah.
PDF cun “Kanzi khua ih umhmun khuar ralhrang ralkap le Pyu Saw Htee pawl cu kannih mipi ralkap komkhawm in sun nazi 1 hrawngah drone in bomb 3 kan thlakih, ralhrang 18 an thi. Ralhrang pawl cun ralthuampi in kan umnak lam an kap ciamco ve.
“Bomb kan thlak hnuah kanmah in pantu ralhrang pawl cu meithal in kan kap bet ciamco ih, ralhrang 2 an thi bet. Ralhrang pawl an dinhmun a that lo tikah ralhrang dang an cah betih, ralhrang dang an rat bet ruangah dung kan sip. Dung kan sip laiah PDF sungtel pakhat ralhrang pawlin an kap that.
“Tuitum ah komkhawm 19 in ralhrang kan do ih, Farmers Revolution Force FRF (CHU)၊ Aung San Force ASF၊ မုံရွာဗန္ဓုလနှင့်အဖွဲ့သားLDF၊ Monywa Lightning PDF၊ Chaung U Revolution Army (CRA)၊ Chaung U Revolution Army (CRA-2)၊ Revolution Army၊ Monywa Peregrine PDF၊ Black Wold Defence Force၊ Chaung U Local Defence Force၊ Black Eagle People’s Defence Force၊ Monywa Brave Hearts MBH၊ Dragon Brothen’s PDF၊ SalinGyi People’s Defence Force(SPDF)၊ Zarmini MMU၊ မြောင်မြို့နယ် တော်လှန်ရေးတပ် (MRA)၊ Myaung PDF CDSOM၊ Black Eagle Defence Force နှင့် ကန္တာရသိန်းငှက် pawl kan si,” tin thu an suah.
Leave a Reply