Sagaing ramthen Kalaymyo Tahan veng ih mipi pawl cun June 14 zan in meithal puak awn le bomb puak an thei zo ih, tuini June 15 khalah meithal puak awn le bomb puak awn an thei bet rero thotho tin an sim.
Tahan ih um pakhat cun “Mizan in bomb puak awn le meithal puak awn kan thei zo ih, an kap aw rero. Tuini lam cun boruak a ziaum dingah kan ruat nan, puak awn kan thei peh thotho. Zinglam nazi 9 hrawng cun meithal puak awn tlunah bomb puak awn khal theih ding a um phah.
“Tuitum cu Tahan Bualrawn lamah a si ih, Bualrawn kiangkap ih um pawl tla cu innsung ah an khum aw thluh. Zanlam nazi 3 tiang hrawng cu meithal puak kan thei phah. Karlak ah bomb puak awn khal theih ding a um. Tahan khawpi sungah an do aw siko. Doawknak ih thi le hriam ngah tivek cu kan thei ban lo,thuhla an suah cing ding ko ding. Tuizan teh ziangtin kan si vivo ding tikhal kan rel thei hrih lo.
“Thuhla kan theih dan vek asile ralhrang pawl Tahan bualrawn ah umhmun khuar an tumih, mipi ralkap lamin an duh lo tikah an kap hngal. Ralhrang pawl khal tlan tum loin umhmun khuar hnget deuhdeuh an tumih, cutikah doawknak a sosang. Sanmyo lamih ralhrang pawl khal Tahan bualrawn lam an pan supso. Ralhrang ih kahmi ralthuampi tla cun inn hrekkhat a tlaksiat zo. Cipciar cu mipi ralkap lamin an than leh ko ding a si,” tin a sim.
Delhi Kiang Hnatuannak Ah Chin Tlangval A Thi – India ram khawpi Delhi khawpi kiang, Noida ih hnatuannak ah Chin tlangval pakhat Pau Ngaih Thang cu damlonak ruangah June 14, zanlam nazi 5 hrawngah a thi.
Pau Ngaih Thang (kum 19) cu June 14 sun ah a sung a dok ih a luak. A hnatuannak ah sunvu sungdok le luakluak in a um ih a that thei lo ruangah a rualpi pawl in sizung ah an fehpi. Asinan dam thei nawn loin sizung ah a nunnak a cem
Pau Ngaih Thang hi Myanmar ram buainak ruangah Delhi pan a si ih,Delhi a thlennak a rei hrih lo nan, Delhi a thlen veten Noida hnatuannak hmun lamah a rak feh cih. Noida ah China Company OPPO le VIVO innpi sak rero a si ih, Chinmi tamzet hnatuan in an um.
An hlawh zat hi thla khatah Rs. 15000 in hram an thok ih, anmah ten rawl an cawm aw. An hnatuannak company in umnak room a pe hai ih mahte rawl an suang. An hlawh cu a ziaum vio nan, an umnak hmun le tidai a tha lo tin a hmunih um pawl cun an sim.
A hmunih um pakhat cun “A tufang hi India ram a sat tuk caan a si ih, nisa lakah hnatuan cu a ol lo ngaingai. Cumi ah pangka te thawn um kan si ih, a hlum tuar a har lawlaw. Buaithlak zet pakhat cu tithiang in ding leicop a tul ih, hmanmi tidai khal duhthu a sam lo. Cuhnakin luarkai sawn cu ekinn tha a um lo ih, lailam ekinn vek a si.
‘Cutik ah mi tamzet cu hnatuan thei lo siloin a hmun ih um thei lo ruangah kirsal khal tampi an um. Hriselnak hrang duhthu a sam lo nasa. Asinan, Delhi ah tuan ding a vang tukih, hna a har tlunah hlawh a mal. Curuangah, kannih cu harnak phunkip tuar in tuan tento kan si,” tin a sim.
A tufang Myanmar ram buainak ruangah Delhi thleng Chinmi an hnih thum zetih, Delhi ah hnatuan ding a har fawn, Noida innsaknak ahcun hnatuan ih feh tlangpi a si.
Delhi ih um pakhat cun “Kei cu ka sungte pawl Delhi ra lo dingin ka simthei hai. Mi tampi cu thuhla thei loin Delhi an ra panih, ramdang feh cih an tum. Cuvek a si lamlam lo, UN lamzin a ong hrih lo ih, zokhal ramdang an feh thei hrih lo. Mithar pawl khal card pek an silo ih, Temporary card lawng an kol. Tuhrih ahcun boruak a tha lo a si,” tin a sim ve.
Delhi ih Chinmi pawlkom hotu cun “Tu ah mihlun lakin visa hngak cia pawl hman a kum telin an feh thei lo ih, India cozah in Exit permit a pe duh lo. Mithar hrang ahcuan ziangtin card taktak an ngah thei ding timi kan buaipi ih, ziangtikah card taktak an ngah ding timi khal kan rel thei lo. UN lamin card taktak an pe rori ding timi khal a um hrih lo.
“Delhi khawpi sung ahcun hnatuan ding a vang ih, hlawh khal a mal. Cutikah thlengthar pawl cu ramleng in bawmtu an nei lo asile an harsa tuk lawlaw. Delhi a hlum tukih pangka lawngin um a har. Cutikah inn san man ,eiin le meisa man thawn an harsa fualfo tuk a si,” tin a sim.
Tlawnginn A Kangral – Kachin ramkulh, Myitkyina khawpi, Man Khing vengsung ih um suakthuan tlawng cu June 15, zinglam nazi 2:30 hrawngah a kang.
Mithmutu in, “Zanlai nazi 2:30 hrawngin a kang thok. Nazi 3:00 hrawng lawngah mitat motor a thleng thei ih, innkang cu an mit thei. Tlawnginn tlunlam a kangral thluh ih, a hnuailam khal malte lawng a tang.
‘Ziangtin tlawnginn a kang timi cu felfai in kan thei hrih lo nan,tlawnginn ah thupte lut an um dingih, cutin an urkang siko ding tin kan ruat. A kang naa tukih,mitat mawtaw lo cun kan rak mit thei lo. Mitat mawtaw a thlen hnuah an mit thei fang” tin a sim.
Ralhrang ralkap cun June 2 in rampi huap tlawng an rak phuan ih, Kachin ramkulh sung khalah ralhrang hnuai ih tlawngkai an tam. Myintkyina khawpi khalah tlawng an phuan fel zo.
Ralhrang in rampi thuneihnak an lak hnu 2021 kum sung khalah ralhrang cun tlawng an rak phuan zo ih, ralhrang phuanmi tlawng duh lo an tam. 2021 kum sungah Myanmar ram sungin tlawnginn tamzet a rak kang ih, tui kum khal ralhrang in tlawng an phuan thok zo bangin, tlawnginn kang theih ding a um thok rero zo.
Ralhrang In Mipi Lamtang 5 An urkang That – Makui ramthen Yesagyo myone ih PDF sakhan pakhat cu June 10 ah Ralhrang ralkap pawlin an luhcilh ih, an kaihmi mipi lamtang 5 pawl cu nungcing in an urkang that thluh.
Ralhrang in an kaih hnuah an urkang thatmi pawl cu CDM tlawng sayakyi U Win Kyaw, Tlawng sayamah Zali Naing, PDF sungtel The Eih Eih Win, tlawng sayamah Khin Hnin Win ( naupai) le PDF sungtel Wung Kung pawl an si.
June 10 , zinglam nazi 3 hrawngah ralhrang ralkap cun Yesagyo PDF sakhan pakhat an luhcilh. PDF lamin an bomb kammi an puakter ih ralhrang 13 an thi. Doawknak ah ralhrang an thi tam nan, mipum an tam tuk tikah PDF sakhan an luhcilh thei thotho ih, mi 5 an kai. An kaihmi pawl cu nungcing in an urkang ih, June 14 lawngah PDF lamin ralhrang ih thahmi mi 5 pawl ih ruang an hmufang tin an tarlang.
Zian Tuah Cangsualnak Ah PDF 4 An Kang – Sagaing ramthen Chuang Oo myone sungih cangvai CRA sungtel 4 pawl cu zian tuah cangsualnak ruangah an thil hmanmi a puak ih, PDF 4 an kang.
“Chuang Oo myone sungah ralhrang pawl nasa ten an cangvai ih, PDF lamin duh vekin zian hman ding an nei lo. Cutikah manhlap zetin zian an deng. Bel ih kop zian an ziahfai laiah a alh ih, mi 4 an kang. Mi pahnih cu an hmai a kangih, midang pahnih cu an kut le ke a kang.
“Tu ah an pali in hmunhim ah tuamhlawm rero an si ih, sii lei ding siseh thildang tulsammi leinak hrang bom tul tuk an si. Kannih mipi cun theitawk in kan bawm rero nan, ralthuam tuah cia kan pek thei lo tikah anmah ten ralthuam an tawlrel ih, an buaipi. Cutikah cangsualnak ih thih phah khal an tamzet thlang a si,” tin buaipitu pakhat cun a sim.
World Cup Lek Ding Team 32 A Fiang Zo – 2022 FIFA World Cup tel thei dingih zuamawknak cu thehfel zo a si ih, team 32 pawl cu FIFA World Cup lek dingin an tling fel zo.
Team 32 pawl cu group 8 then an si ih, Group A ah Qatar, Ecuador, Senegal, Netherland, Group B ah England, Iran, USA, Wales, Group C ah Argentina, Saudi Arabia, Mexico, Poland, Group D ah France, Australia, Denmark, Tunisia, Group E ah Spain, Casta Rica, Germany, Japan, Group F ah Belgium, Canada, Morocco, Croatia, Group G ah Brazil ,Serbia, Switzerland, Cameroon, Group H ah Portugal ,Ghana, Uruguay le S.Korea pawl an um.
Group tin veikhat ciar an do aw dingih, cumi hnuah group tin a sangbik le a sangtu pawlin sungsuak an lut ding. Cumi hnuah quarter final, semi finan le final tin lek vivo ding an si.
2022 FIFA World Cup cu Qatar ram ah an lek dingih, November 21 ah an lek thok ding. Qatar ram khawpi 5 ah an lek dingih, 2022 December 18 ah final lek ding an si.
Leave a Reply