Sagaing ramthen kalaymyo Tahan veng, Bazar kiangih KT rawldawr cu may 10, zan nazi 10:30 hrawngah ralthuampi in a tlak ngah ih, inn luanglu a siat tlunah inn sungih retmi thil hrekkhat khal a siat phah zetih, innsang nubik le a fanu in an kutah hriam an ngah.
May 10, zan nazi 9 hrawngin Kalaymyo , Tahan, Sanmyo, Tuangphila tivek veng ih umpawl cun bomb puak awn le meithal puak awn an thei ih, Cumi hnu tawkfang nawn ah ralhrang ih kahsuahmi ralthuampi cun KT rawldawr inn a thlak ngah.
An venghnen pakhat cun “Inntek tei cu inn dot tlunah an it. An ihnak kiang luanglu ah ralthuampi a tla ih, an ihkhun kiangah a tla. Inn dot tlunsawn cu a siat phah zetih, minung an thi lo cu Pathian humhimnak rori ruangah a si,” tin a sim.
May 10 zan ahcun Taungphila , Tahan le Sanmyo pawl ah ralhrang kan kap tin mipi ralkap lam cun thu an suah zo. May 11 zing khalah ralhrang pawl cu 9maing lamah an vaktawi rero. Mawtaw menmen 5 sungih to ralhrang pawl cu Kalay phunsang tlawngah an lut ih, a kiangkap lamzin tluanah ralhrang pahnih pathum in an um tiah kiangkap mipi cun an sim.
Leave a Reply