Sagaing ramthen Kalaymyo Tahan veng bualrawn ah ralhrang pawl umhmun khuar an tum cu mipi ralkap lamin an do ih, ralhrang 2 an thih tlunah veng sungih meisa man dil ralhrang 2 khal kan kap that tin mipi ralkap CNDF cun thu an suah.
CNDF cun “2022, June 13 ah ralhrang thazang 120 kiangkap hrawng cu, Kalay khawpi, Tahan veng Bualrawn ah umhmun khuar dingin an ra thlen ruangah CNDF le Hmunram kilhimtu ṭangkop pawlin June 15, zinglam nazi 9 ihsin nazi 10 hrawng tiang kan va kap.
“Cui kahdoawknak ah ralhrang lam mi pahnih an thi ih, hliamtuar pathum an um. Cumi caan thotho ah vengsung ih Electric Bill khongtu ralhrang pawl cu Hmunram kilhimtu tangkop pawlin an kap ih,ralhrang pahnih thi in ralhrang pali hliam an tuar. CNDF le Hmunram kilhimtu tangkop lam ihsin hliamtuar kan umlo a si,” tin thu an suah.
CNDF cun Falam tlawnginn kiangih catar khal anmah an silo thu an sim ih,ralhrang in mipi le mipi ralkap lakah huatnak um seh tin an tuah hrimmi a si in CNDF Spokeperson cun a sim.
CNDF Spokeperson cun “Ralhrang ralkap cun Falam tlawnginn kiangih bomb an puah hnuah inn pakhat ah ca an tar. nan fale ruak nan sar duh asile tlawngkaiter uh tin cafang dik lopi thawn an tarlang. Hivek cu ralhrang in CNDF pawl thangsiat duh ruangah men a si.
“Dothlengnak thok lamah Hakha ih ralhrang pawl cun Bible bungcang tiang hmangin mipi hronak ca an rak tar ih, catartu ralhrang pawl cu kan hnenah CDM in an lut thluh zo. Kannih CNDF in ka tuah asile a puak men lawng a silo ding. Curuangah tlawnginn kiangih bomb puak khal kannih kan silo a si,” tin mipi a simthei.
KIA In Ralhrang An That Tam – Shan ramkulh Kuatkhai lamah KIA cun ralhrang ralkap an do ih, ralhrang thi tin KIA lam cun an sim.
KIA sungtel cun “Ralhrang thawn kan do aw taktak ko. Moekoe lamin ra an si ih, Kuatkhai ah kan rak kap. Doawknak ah ralhrang thi an tam nan, a zat kan fiah thei lo. Zanlam nazi 6 hrawng khalah ralhrang mawtaw bomb kan puah bet.
“Indaw myone Meza uksuh Alesik khua kiang khalah ralhrang 50 hrawng umkhawm zinglam nazi 9 hrawngah kando ih, ralhrang 9 tlun cu an thi. Ralhrang mawtaw hmaiah kilhim hnatuan ih feh an si ih, mawtaw a thlen hlanah kan rak thianfai.
“Nazi 4 sung kan do aw ih, ralhrang ralkap cun ralthuampi thawn in kap ciamco. Ralhrang kahmi ralthuampi cun inn pakhat a tlaksiat. A tufang cu Sagaing ramri khalah ralhrang thawn kan do aw phah ringring a si,” tin kachin thuthang a simthei.
Doawknak Ah Ralhrang 5 An Thi – Makui ramthen Yesagyo myone ah Yesagyo PDF cun nasa ten ralhrang ralkap an do ih, June 15 zingih an doawknak ah ralhrang 5 an thi tin mipi an theihter.
Yesagyo PDF cun “June 15, zinglam nazi 7 hrawngah Yeasgyo myoe sungih mipi inn nawkkangtu ralhrang ralkap pawl cu kannih Yesagyo pDF le kan tuanpi KNT pawlin bomb kan puah ih, naivai ten kan kap ciamco.
“Doawknak ahcun ralhrang 5 an thi ih, hriam ngah 8 an um. Ralhrang ralkap cun doawknak ah ralthuampi thawn in kap ciamco nan, kannih mipi ralkap lam kan him a si,” tin thu an suah.
Thawnginn Sungah Rawl Loin An Khum – Ralhrang ralkap cun ram buainak ruangih an kaihmi lakin mi tamzet thih dan an pe zo ih, cumi lakin mi 4 pawl cu a takin thlaithat an si ding tin thu an suah.
Ralhrnag in a takin kan that ding an timi cu NLD palai Phyo Ziya Thaw le 88 tlawngta hotu Jimmy tlunah midang 2 pawl an si. Midang pahnih cu venglal an that tin ralhrang cun thih dan an pekmi a si ih,NLD palai le Jimmy cu dankalh PDF pawl hruaitu an si tin ralhrang cun thu an rak suah.
Ralhrang in that dingin mi 4 pawl hremnak an pek tikah Insein thawnginn sungih um thawngtla pawl cun ralhrang thuthen dan an dokalh ih, rawl ei loin duhphorhnak an nei. Thawnginn sungih duhphorhnak neitu pawl cu ralhrang pawlin an kai ih, room pakhat sungah an khum thluh in U Htun Kyi cun a sim.
U Htun Kyi cun “Mi 11 an si ih , rawl ei loin thawnginn sungah duhphorhnak an nei. Ralhrang in thihdan an pekmi pawl a takin that dingih thu an fehpi tum ruangah duhphorhnak nei an si. Rawl eilo ih duhphorhnak nei an si tikah thazang an nei lo zetih, cuvek cing khalin ralhrang pawl cun an hrem ciamco.
“Tu ahcun ralhrang in ziangtluk in an hremna timi khal kan thei nawn lo. Anmah ralhrag lam cun cuvek kan tuah lo tin an pha rero nan, thuhla felfai zet kan theihmi a si,” tin a sim.
ASEAn Myanmar Palai Myanmar Feh A Tum – ASEAN pawlkom in Myanmar palai ih an ruatmi Prak Sokhonn cu June thlacem ah Myanmar ah feh a tum.
Prak Sokhonn cu a tufang ASEAN Myanmar palai a si ih ASEAN Le Myanmar ralhrang remnak neihmi pitlin tumin Myanmar feh tum cu a si. Myanmar ralhrang lamin harsatnak an neih ruangah ASEAN Myanmar palai Prak Sokhonn cu Myanmar ah an rak cohlang lo lawk. Asinan, tu ahcun an be aw zo.
Prak Sokhonn cu tui kum hrang ASEAN Myanmar palai a si ih, kan dungah Myanmar a rak feh zo. Asinan, a duh vekin zianghman a rak tuah thei lo ih, Daw Suh khal a hmu thei lo. Tuitum ah ASEAn Myanmar palai cun Daw Suh ton a beisei tuk nan,ralhrang lamin an tonter zum a silo.
ASEAn le ralhrang ih remnak tuahmi 5 pawl cu thahrumthawh cangvaih le ralthuam hmangih cangvaihnak tawp dingin, pawlkom zaten a thazawng ih be aw dingin, ASEAN Myanmar palai zuamnak thawn khat le khat be aw dingi, Bomnak pekmi lamtluang ten lutter dingin le ASEAN Myanmar palai Myanmar a feh tikah a duhmi pohpoh tong thei dingin timi pawl an si.
Ralhrang ralkap cun kaihmi zokhal ramdang palai kan tongter thei lo an ti ih, Daw Suh cu ramleng palai tonter an um lo lawlaw. Cutikah ASEAN Myanmar palai khal a hlawsam sal ko ding titu an tam.
Ukraine In Russia Dilnak An Pom Lo – Russia in thla 4 zik Ukraine an do hnuah ,Ukraine nisuahnak lam cu lakfel thluh a tumih, Ukraine lamin an duh ve silo, UKraine nisuahnak lam Donbas ramthen sungah Russia ralkap le Ukraine ralkap pawl an do rero.
Ahleice in Russia ralkap pawl cun Ukraine nisuahnak lam Donbas ramthen sungih Sievierodonetsk khawpi cu hmun tamsawn an luah zo ih, Ukraine ralkap pawl malte lawng an si thlang. Cutikah Russia ralkap pawl cun Ukraine ralkap pawl hnenah pe aw men dingin an simthei.
Asinan, Sievierodonetsk khawpi sungih um Ukraine ralkap pawl cu Russia kutah an pe aw lamlam ih,theitawk in Russia ralkap pawl do vivo an tum. Ukraine ralkap pawl cu thir hmunpi sungah relh an si ih,an pe aw lo asile nasa ten tuar thei an si.
Asinan, Sievierodonetsk khawpi sungih taang Ukraine ralkap pawl cu Russia kutah pekawk an tum hrih lo. Russia lam cun Sievierodonetsk khawpi an lak fel tikah Donbas ramthen sungin khawpi dang lak bet vivo an tum. Cumi ahcun Donetsk le Luhansk khal felfai zetin zalennak pek an tum.
Leave a Reply