Chin ramkulh Tedim peng sungah ralhrang ralkap le mipi ralkap pawl may 17, sun nazi 2 hrawngah an do aw ih, doawknak ah ralhrang 7 an thi tin PDF Zoland cun mipi theihternak an nei.
PDF Zoland cun “June 16 ah ralhrang mawtaw 17 cun Kalaymyo suahsan in Chin ramkulh Tedim peng an rak lut. Ralhrang ralkap pawl cu June 17 , sun nazi 2:30 hrawngah Tedim thlen hlan Hawp kiang an thleng.
“Ralhrang mawtaw hrang lamzin sial ih rak feh hmaisa ralhrang pawl cu kannih PDF Zoland le CDM Siyin in kan rak kap. Doawknak ah ralhrang 7 an thi ih, ralhrang 15 tluk hriam an ngah. Ralhrang lamin ralthuampi an hmang ciamco ih, kan naih thei nawn lo ruangah kannih mipi ralkap pawl cu himdamten dung kan sipsal a si,” tin mipi an theihter.
CDM Siyin khalin “Ralhrang ralkap mawtaw 17 cun jUne 16 ah Kalaymyo in Tedim an rak pan ih, June 17 , sun nazi 2:30 hrawngah Tedim thlen hlante ah kan kap. Doawknak ah ralhrang 7 an thi ih, ralhrang 15 in hriam an ngah. Ralhrang lamin ralthuampi an hman ciamco ruangah kannih mipi ralkap pawl cu hmai kan nawr thei nawn lo ih, dung kan sipsal a si,” tin thu an suah ve.
Tlan A Tum Ruangah PDF In Palik An Kap That – Makui ramthen Yesakyo myone ah PDF pawlin palik Naing Min Htut an kai ih, tlan a tum ruangah an kap that lawlaw tin PDF cun thu an suah.
Palik Naing Min Htut cu Yesagyo myone sungah mipi siah dil in a vakkual theu ih, June 16, sun nazi 12 hrawngah PDF lamin lamzin ah an rak bawh ih, an kai.
PDF pawlin palik Naing Min Htut an kaih hnuah an hmunpi ah hruai an tum ih, lamlak ah palik Naing Min Htut cun PDF pawl ih meithal cuh in tlan a tum. Asinan, PDF pawl ih meithal a lak man hlanah PDF pawlin an kap that lawlaw.
Palik Naing Min Htut cu Black Wolf PDF, MGN Tiger, Myin Gian PDF, Bagan Nyaung Oo PDF pawlin lamlak ah an rak bawh ih, an kai. Thaten thu an sim tummi a sinan, PDF meithal a cuh tum ruangah kap that an si tin thusuah ahcun an tarlang.
Lung Mankhung Phur Ralhrang Mawtaw An Kap – Kachin ramkulh Myintkyina khawpi lamzin in Mandalay lamih feh vivo lung mankhung phur ralhrang mataw 65 cu Mandalay ramthen Ta-kuang myone sungah PDF pawlin an rak kap ih, ralhrang 3 hnakin tam an thih tlunah ralhrang mawtaw pakhat a siat tin thu an suah.
Lung Mankhung phur ralhrang ralkap mawtaw 65 pawl cu Sagaing ramthen Htee Chaing khawpi an lan zo ih, Mandalay ramthen Ta-kuang khua in peng 5 hrawng hla ah PDf in bomb puah in an rak do.
Ta-kuang PDF hotu cun “Thuhla kan theih dan cu ralhrang mawtaw 28 ti a si. Asinan, a taktak ahcun ralhrang mawtaw 65 a rak si. Htee Chaing lanah ralhrang pawl umhmun khuarnak hmunpi a um ih, cutawk ih umcia ralhrang mawtaw pawlin an thlun bet khal a si thei. Cucu, bomb puah in kan rak do ih, tawkfang cun kanmah lam himdam ten dung kan sipsal.
“Sagaing ramthen Intaw le Htee Chiang karlak ah veikhat bomb an rak puah zo ih, kannih in Mandalay ramthen sungah avei hnihnak bomb puah in kan rak do. Bomb kan puahmi ah ralhrang mawtaw siat a um ih, ralhrang thi khal an um rori a si,” tin a sim.
KIA le TNLA In Ralhrang An Do Peh – Shan ramkulh Saklam Kuatkhai myone Kaalai ( ကာလိုင်ရွာ ) khua ih raltlan umnak hmun cu June 17, zinglam nazi 10 hrawngah ralhrang ralkap in ralthuampi in an kap ih, raltlan pahnih an thih tlunah hriam ngah pakhat a um tin buaipitu pawl cun an sim.
Raltlan pakhat cun “Ralhrang ih kahmi ralthuampi cu raltlan umnak inn pakhat ah a tla ih, nufa hnihte an thih cih. Hriam ngah pakhat khal a bese ngaingai. Asinan, tuamhlawm that a si ahcun a tha thei ko ding. Tutiang cu bawmtu felfai a nei thei hrih lo. Raltlan hmunih umsun sii in kan tuamhlawm rero hrih a si,” tin a sim.
Mithi pahnih cu Daw Nan Lai ( kum 56 ) le a fanu mucu sayamah Daw Naw ( 28 ) tei pahnih an si. Hriam ngah pakhat cu U Duam Phawng Lah Aung a si.
Kuaikai myone Kaalai khua kiang ahcun Kachin ralkap KIA le ralhrang ralkap pawl cu June 16 in an do aw zo ih, June 17 khalah an do aw peh. June 17, zinglam nazi 9 hrawngah TNLA in ralhrang pawl umnak an kap ih, ,ralhrang pawl khalin kiangkap cu ralthuampi in an kap ciamco ve tin a kiangih um pawl cun an sim.
Mibawmtu pawlkom sungtel cun “KIA le ralhrang karlak boruak a sosang ngaingai ih, khatlam ah TNLA le ralhrang khal an do aw. Tutiang cu mithi 2 ruang khal kan phur thei hrih lo. Doawknak karlak ah raltlan pawl an um ih, tih a nung lawlaw. Hivek cu khatlam khatlam in theithiam hai sehla kan duh tuk lawlaw a si,” tin a sim.
ASEAn Palai In Daw Suh A Tong Thei Lo Ding – ASEAn Myanmar palai Prak Sokhonn cu tui thlacem ah Myanmar feh tum a si ih, Myanmar a feh tikah Daw Suh Kyi ton thei a beisei. Asinan, ralhrang lam cun tonter an rak tum lo cia zo.
Kan dung khalah ASEAn Myanmar palai Prak Sokhonn cu Myanmar a rak feh zo ih, Daw Suh ton a tum tuk nan , a tong thei lo. Tuitum ahcun ASEAN Myanmar palai Prak Sokhonn cun Daw Suh a ton thei rori a rak beisei zetmi a si ve.
Ralhrang thuphuangtu Zaw Min Tun cun “Tuitum khalah ASEAn palai in a ton theimi pawl cu tong thei dingin lamzin kan rak sialsak ding. Asinan,a theih dingmi cu thubuai nei lai zokhal a tong thei lo ding. Thubuai nei lo a ton duhmi pawl cu tong thei dingin kan tawlrel sak ding a si,’ a ti.
ASEAN tuanvo neitu pawl cun ralhrang ralkap hnenah ASEAN palai cu Daw Suh le tulsammi hruaitu dang khal tongter dingin an dil rero nan,ralhrang cun ASEAN dilmi cu pitlinter an tum lo.
ASEAn Le ralhrang remawknak ahcun ASEAN palai in a duhmi pohpoh a tong thei ding timi a tel nan, ralhrang lam cun NUG, CRPH le thubuai nei lai pawl cu ASEAN palai in a tong thei lo ding tin thu an rak suah. Hivekin ralhrang lam an lungruh hnuah ASEAN lamin tuah tumdan lamzin thar neihmi an nei hrih lo.
Leave a Reply