Tedim Khawpi Sungah An Kap Aw

Chin ramkulh Tedim khawpi sungah ralhang ralkap cun June 12, zan nazi 9:15 hrawngin ralthuampi an kap ciamco ih, Tedim khawpi sungin inn 10 a siat.

Tedim khawpi sung myone palik sakhan le Ah-htah-kah 1 tlawnginn ih umhmun khuar ralhrang ralkap pawl cu mipi ralkap lamin an va kap ih, doawknak a suak. A hnuah ralhrang cun ralthuampi an hmangin tlawnginn kiang an kap ciamco. Cumi ruangah tlawnginn kiangih mipi inn pawl a siat phah.

Tedim ih um pakhat cun “Zan nazi 9 hrawngin puak awn kan thei thok. Mipi thi cu an um lo. Minute 30 hrawng an kap aw. Cumi hnuah ralhrang ralkap cun ralhtuampi an hmangih duhtawk in an kap ciamco. Ralhrang ih ralthuampi kahmi ruangah mipi inn 10 hrawng a siat ih, inn luanglu siat le inn sangka siat tivek an si,” tin a sim.

Mipi ralkap lam cun Tedim khawpi sungih doawknak thuhla thawn pehpar aw in mipi theihternak an nei hrih lo. Tedim mipi ralkap lam cun ralhrang hnuaiah tlawngkai an duh lo ih, ralhrang cun Tedim khawpi sungah tlawng an phuan zo. Cutikah ralhrang ralkap le mipi ralkap karlak boruak a tha lo ngaingai tin mipi cun an sim.