Tedim Peng Sungih Ralthuamkai Pawlkom 8 An Tongaw

Chin ramkulh Tedim peng sung lawng khalah ralthuamkai pawlkom tamzet an um ih, may 15 ah hmunkhat ah tongaw in thureltlangnak an nei.

Tedim peng sungih ralthuamkai tonawknak ahcun pawlkom 8 an suak thei ih, CDF-Hualngoram၊ CDF – Tonzang, CDM-Siyin, LDF – New Haimual, People Defence Army (PDA), PDF Zoland, Zogam Army le Zomi PDF pawl an si.

Tonkhawmawknak ahcun nazi 3 sung tluk thu an relkhawm ih, hmunkhat peng khat sungih cangvai ralthuamkai an si bangin khat le khat theihthiamawknak nei dingin, khat le khat buainak um lo dingin, khat le khat kap aw lo dingin, khat le khat pehtlaihawknak tha sinsin dingin timi pawl an rel.

Tuanvo neitu pakhat cun “Tuitum kan tonawknak ah ZRA an tel lo, tel dingin kan sawm rero nan, tuitum ahcun an remcang lo. Hmailam ahcun ZRA khal tonkhawmawknak ah tel dingin kan sawm , kan lem rero hrih a si,” tin a sim.

Inn Tin Meisa Ca Dil Vivotu An Kap That – Yangon Thanlyin vengih meisa ca dil vivotu ralhrang hnuai ih hnatuan pakhat cu May 16 zanlam ah ralthuamkai hrekkhat in an kap that.

Thanlin ih um pakhat cun “Tutiang cu zo pawlkom in an kap that timi thusuah an nei hrih lo. Inn tinah meisa ca dil in vak vivo ralhrang hnuai ih hnatuan cu an kap that rori ko. Ralhrang ralkap cun lo theih loin meisa man an peter ih, pe duh lo cu meisa hri tla an sah cat sak.

“Cutikah mipi ralkap lam cun ralhrang hnuai ih hnatuan pawl cu an hna bansan dingin ralrinnak an pe rero ih, ralhrang hnenah meisa man pek a tul lo tin thu an suah ve. Cutikah khat le khat doawknak a sosang ih, hivek a ton phah siko.

‘Hivek a thlen hnu cun kiangkap ah palik le ralkap an khat cupco hngal nan, tutiang cu kaihmi an nei hrih lo ih, lamzin tla an ong thluhsal zo,” tin a sim.