Chin ramkulh Thantlang khawpi sungah CDF le ralhrang pawl may 23 , zinglam nazi 7 hrawngah an do aw ih, doawknak ruangah ralhrang pawl cun Thantlang khawpi sungin inn hrekkhat an nawkkang bet.
Thuhla theitu cun “Zinglam nazi 7 hrawngin an kap aw thokih, sun hnu tiang khat le khat kahawknak thawmvang kan thei peh. Ralthuampi tiang an hmangih, JMBC biakinn lam tiang ralhrang pawl an thleng. Doawknak ruangah ralhrang pawl cun Thantlang khawpi sungin inn hrekkhat an nawkkang bet.
“Tutiang cu inn ziangzat an kang timi felfai in kan thei hrih lo. Khat le khat doakawk ih mithi cazin khal theih a si hrih lo. Doawknak ruangah khatlam khatlam in hriam ngah an um timi cu kan thei zo. Tuini doawknak ruangah ralhrang pawl cun Thantlang pituh sizung kiangkap ih mipi inn pawl an nawkkang. Innkang zat cu kan sim thei hrih lo,” tin a sim.
Ralhrang ralkap in rampi thuneihnak an lak hnuah CDF Thantlang le ralhrang pawl cu Thantlang khawpi sungah an do aw rero zo ih, doawknak ruangah ralhrang pawl cun Thantlang khawpi sungin inn 1000 tlun an nawkkang zo.
Kalay Ah Meithal Kengin Meter Box An Cek – Sagaing ramthen Kalaymyo Tahan vengah ralhrang ralkap le palik pawl cun ralthuam kengin May 23 zingah an vakkhawm ih, inn tin ah lutin meter box an cek tin inntek pawl cun an sim.
Ralhrang ralkap in rampi thuneihnak an lak hnuah NUG cozah cun mipi cu meisa man pe lo dingin thu an suah. Ralhrang pawl cun meisa man pe lo cu meisa hri tansak thluh ding an si tin mipi an hro ve. Hivek dinhmun ah mipi khal aihal in an um ih, meisa man pe le pe lo an um. Cutikah ralhrang pawl ralthuam kengin meter box an cek phah in a lang.
Tahan ih um pakhat cun “Anmah ralhrang pawl sim dan vek asile meter box kan cek tin an rel. An luhnak inn tinah thu an sim vivo ih, may 29 ah meisa zungah ra tengteng uh tin an theihter. Inn sung lutin an cek tikah meter box lawng siloin thildang zohthupmi khal an nei thei in a lang.
“Kan dung zarh ihsin ralhrang pawl cun Tahan le Taungphila veng ah meithal kengin meter box ceknak an nei thok. RPG ralthuampi khal an kengtel. Meter box zoh phah ih buainak a um asile ralthuampi thawn mikah khal an man cia in a lang. Ralhrang ralkap le palik komkhawm an si,” tin a sim.
Mindat Ah Ralhrang 2 An Kap That – Chin ramkulh Mindat khawpi in nisuahnak lam mitat tlangih umhmun khuar ralhrang ralkap pawl cu Mindat CDF in may 22, zan nazi 10 hrawngah an va kap ih, ralhrang 2 an thi tin May 23 sun ah mipi theihternak an nei.
CDF Mindat cun “May 22, zan nazi 10 hrawngah Mindat in nisuahnak lam mitat tlangih umhmun khuar ralhrang ralkap pawl cu kannih Mindat CDF in kan va kap ih, minute 30 sung khat le khat kan do aw. Khat le khat minute 30 sung kan doawknak ah ralhrang 2 an thi ih, kannih Mindat CDF sungtel pawl cu himdam ten dung kan sipsal.
May 23, zinglam nazi 8:15 hrawngah Mindat khawpi sungih um ralhrang pawl cun Taih-ne 4 lam cu ralthuampi in an kap ciamco ih, kum 11 nauhak a ke khatlam a bul. Kum 40 upa nupinu khal a lu ah hriam a ngah ih , mipi inn 2 a siat phah a si,”
Matupi in Mindat lamih feh ralhrang pawl cu Mindat in makui ramthen Kyauk Htuh lamah an feh thluh zo ih, tuitum cu Mindat khawpi kiangih umhmun khuar ralhrang pawl CDF Mindat in an va domi a si.
Leave a Reply