Chin ramkulh Matupi le Paletwa karlak ih ralhrang sakhan ah ralhrang pawl mipum an ret bet rero cu CDF Matupi in JUne 7 ah an do ih, ralhrang 7 an thi tin June 11 ah CDF matupi cun thu an suah.
CDf matupi cun “June 4 ah Matupi in suak ralhrang pawl cu Matupi le Paletwa karlak Hte Bwe sakhan ah an feh ih kannih CDf Matupi cun June 7, sun nazi 1 hrawngah bomb puah in kan do. Cumi ahcun ralhrang 7 an thi ih, ralhrang 5 hnakin tam hriam an ngah. Cucu mipi kan lo theihter duh a si,” tin an tarlang.
CDf kanpetlet khalin an sakhan urkangtu ralhrang ralkap an do ih, June 12 ah ralhrang 16 an thi tin mipi an theihter.
CDF kanpetlet cun “June 12, zinglam nazi 8 in zanlam nazi 5 tiang kannih CDF Kanpetlet le ralhrang ralkap kan do aw. Ralhrang pawl cu kan sakhan an lakmi ah umhmun an khuar ,kannih mipi ralkap komkhawm cun nasa ten kan do. Cutikah kan sakhan an urkang an suak. An suah phah in ralthuampi an kap ciamco ih ,kiangkap khua mipi pawl an tlan thluh.
“Hivekin nasaten ralhrang ralkap kan do laiah Kanpetlet khawpi ih um kan CDF miraltha pawl cun kanpetlet penguk zungih umhmun khuar ralhrang ralkap pawl an rak do ve ih, ralhrang 5 an thih tlunah hriam ngah tampi an um. Kannih kan sakhan latu pawl kan donak hmun ahcun ralhrang 11 an thi ih,hriam ngah tampi an um ve. Doawknak ahcun kannih mipi ralkap komkhawm lam cu kan him.
“Ralrang ralkap cun lamzin tluanih mipi inn pawl duhtawk in an bauh ih, mipi thilri an firsak vivo phah. June 6 khalah makui ramri ah ralhrang thawn kan do aw ih, ralhrang 3 an thi. Ralhrang ralkap in phone le internet an phit tikah duh vekin thuhla kan lo theihter thei lo phah.
“June 6 khalah kan tatyin pahnihnak ah ralhrang ralkap pawl thawn nasa ten kan do aw zo. June 6 ahcun zinglam nazi 11 ah veikhat, zanlam nazi 3 le 4 ah veihnih tin ralhrang ralkap thawn kan do aw. Kan sakhan lakir sal tumin June 6 ih kan doawknak khalah ralhrang 6 an thi ih,hriam ngah an tam. Ralhrang ralkap mipum 100 hrawng an si,” tin mipi theihternak an nei.
Kalay Ah An Kap Aw – Sagaing ramthen Kalaymyo ah mipi cun June 12, zan nazi 10 hrawngin puak awn phunphun an thei ih, neta ah ralhrang cun duhtawk in ralthuampi an kap ciamco.
Kalay PDF pakhat cun “A thok ahcun khat le khat an kap aw ih, neta ahcun ralhrang pawlin anmah ten ralthuampi an kap ciamco. Curuangah mipi hrang ka um a nuam thei lo. Tuitum kahawkak ah kannih cu kan tel lo ih, thuhla cipciar kan thei hrih lo a si,” tin a sim.
Kalaymyo ih um pakhat cun “Minute 30 tlun cu ralhrang ralkap pawlin ralthuampi an kap puak rero men. Kan theih dan veten ralhrang in Tahan veng an kap ciamco salin a lang. Bomb puak awn tlunah meithal puak awn khal kan thei. Kan dung vekin mipi an tuartuk ding cu ka phang tuk. Ziangahtile, ralhrang pawl cu mipi tuar ding zawngih cangvai an si,” tin a sim.
Kan dungah ralhrang ralkap cun Tahan vengih doawknak ruangah Tahan veng cu duthawk in ralthuampi thawn an rak kap ciamco zo ih, nau nei pekte nupinu pakhat le raltlan nufa an rak thi.
Ralhrang In PDF Pawl An Leem – Ralhrang ralkap cun CRPH le NUG tel loin dothlengnak ih ralthuam kaitu PDF pawl cu ralhrang daan hnuaiah lut dingin June 11 ah sawmnak thu an suah.
Cumi ahcun ralhrang Daan hnuaiah an lut duh asile bikhiahmi daan le dun vekin ralthuam khal an ap dingih, cutin kan ngaithiam ding tin an tarlang. Hi sawmnak ah ralhrang cun CRPH le NUG an sawm lo. A tufang ih remdaihnak thurel reromi khalah ralhrang cun CRPH le NUG an sawm cuang lo.
Ralhrang cun CRPH le NUG cun rampi tlase dingin an zuam ih thahrum thawh cangvaihnak lamzin khihhmuh in PDF pawl an forh, taw an tokih rampi an buaiter tin an sim.
Ralhrang ralkap cun dohthlengnak ralthuamkaitu pawl hnenah Ralthuam kai in rampi nan dodal vivo asile rampi remdaihnak le Democracy cangsuak dingin kan zuamnak cu nan khulfungter thluh ding a si tin an simthei.
Ralhrang Bawi In A Kuthnuai 8 Kap That – Kachin ramkulh ,Myintkyina myone Pyithaungsuh khua ih ralhrang cangvaihnak tlawngah ralbawi Aung than cun a kuthnuai ralhrang 8 a kap that ih, meithal zun 2 a lek hnuah a tlansuak tin thupte mipi lamtanng ralkap pawlin mipi an simthei.
June 6 ah ralhrang bawi pawl cun Pyuthaungsuh khua ih ralhrang zirnak hmun an hal.Cumi ahcun ralhrang 10 pawl sivai ri in an rak buai ih, biak le thusuh an theih lo. Cumi ruangah hotubik Aung than cu ralhrang pawlin an ko ih,hremnak an pe. Cucu, ralbawi Aung Tan a lungawi lo tukih sivai le zuri a kuthnuai ralhrang 10 pawl cu a kap. Ralhrang 6 cu a hmunah an thi ih, ralhrang 2 cu sizung ah an thi.
Thuhla theitu cun “Tlunlam in ralkap cangvaihnak hmun an cek tikah ralkap 10 pawl cu zu le sii ri in an rak um. Cutik an hotubik Aung Than an kawk thlang. Cutikah Aung Than a thiheng tukih, zu le sii ri a kuthnuai 10 pawl cu meithal in a kap hai. A hmunah 6 an thi ih, sizung ah 2 an thi. 2 dang cu an tlan ngah.
‘Amah ralhran bawi Aung Than khal meithal zun2 a la ih , a tlan suak ve. Tutiang cu an kai ngah hrihlo. Ralhrang thi ruang 8 pawl cu kan vui thluh zo a si,” tin a sim.
Leave a Reply