Paletwa Zinghnam An Hrang – Chin ramkulh thlanglam Paletwa le Sami peng sungah zinghnam an tam ciamco ih, cinmi faang thenkhat lak ding khal um loin an ei fai tiah khuami pawl cun an sim.
Khuami pakhat cun “Rua an rah ciamco ih, zinghnam an tam ciamco. Curuangah kannih Paletwa le Sami ih lo hnatuan pawl cu fang lak ding nei lo kan tam. Ziangahtile zinghnam in fang cinmi pawl an ei nasa tuk. Thenkhat taang 100 nei dingih zum aw khal taang 10 lawng nei ding tivek an um. Thenkhat tla cu an lo pumin zinghnam ih ei kolh sak thluh khal an um. A tamsawn cu lo him kan um lo a si,” a ti.
Chin ramkulh thlanglam ahcun 2010 kum ah rua a rak rah ciamco ih, zinglam an rak pung ciamco zo. Cumi kum khalah Chin ramkulh thlanglam ahcun paam a rak tlungih ramdang in nasaten an rak bawm. Rua hi kum 50 dan ah an rah theu tin an sim nan, tu ah Chin ramkulh thlanglam ahcun rua an rahsal ih, zinghnam a tam. Tuitum ih rua rah le 2010 kum ih rua rah a bangaw lo tin an sim thung.
Hivek ruangah lo hnatuan pawl cun NGO hnatuan pawl hnenah bomnak an dil ciamco ih, thlanglam laitlang ah bomnak a lut lo asile an har tuk ding tin an sim.
Chin Ralkap In Ralhrang 19 Thianfai – Chin ramkulh Hakha le Thantlang karlak ih doawknak ah ralhrang 19 an thi tin Chin ralkap thuphuangtu Salai Htet Ni cun mipi a simthei.
Chin ramkulh Hakha le Thantlang karlak ahcun mipi ralkap komkhawm le ralhrang ralkap pawl an doawknak a rei zo ih, November 20 ihsin doawknak boruak a sosang ciamco sal. Ralhrang cun ni 3 sung lai Timit hmunram ah tlunzuang raldonak an hmang zo ih, mipi ralkap lam khalin ralthuam phunphun thawn ralhrang ralkap pawl an rak do rero ve.
Chin ralkap CNA thuphuangtu Salai Htet Ni cun “November 21 ih ralhrang thawn kan doawknak ah meithal zun 7 le ralthuam dangdang kan la ngah. November 20 ih ralhrang thawn kan doawknak ah ralhrang 5 an rak thi. November 21 ih doawknak ahcun ralhrang 14 an thi. Ralhrang lamin in nor rero tikah an umnak hmun kan va kap lawlaw.
“November 22 zing khalah ralhrang pawlin tlunzuang raldonak thawn in ra kap ciamco bet. Asinan, kannih cu umhmun kan khuar hrih ih, siattong kan um lo. November 22 ih thilthleng cipciar cu kan thei famkim hrih lo. Kannih lam cu kan him a si,” tin a sim.
Ralhrang ralkap in timit hmunram an pannak a rei zo ih, Thantlang lam lan vivo tum an sinan, mipi ralkap pawlin lamzin tlunah an rak kham ih, ralhrang pawl cu Thantlang lam la thei loin an um. Chin ramkulh Falam peng Tibual sakhan ih doawknak khal ralhrang lamin tlunzuang raldonak an hman ciamco ruangah ,mipi ralkap lam thazang thar an la hrih.
Ralhrang In Anmah Thusuttu An Kai – Ralhrang ralkap cun thuthanglatu pawl an kokhawmnak ah anmah thusuhttu pahnih an kai. Ralhrang cun thla tinten thuthang cinfelnak an nei ih, ramsung thuthanglatu pawl an sawm theu.
Ahleice in ralhrang sawmmi pawl le ralhrang lamtang deuh pawl lawng ralhrang thuthang cinfelnak ah a feh tlangpi ih, ralhrang pawl thu an sut theu. Tu ahcun anmah ralhrang lamtang thuthanglatu khal kaih an si thotho. Ralhrang pawl ih kaihmi thuthanglatu pahnih cu NHP thuthanglatu Win Oo le Daepio thuthanglatu Zaw Min Oo an si.
Thuhla theitu cun “Win Oo sawn in ralhrang pawl hnenah Daw Suh le thawngtla pawl suah dingin thu a sut. Amay Suh a ti tlunah US president Biden ka ttawmpi in ralhrang pawl a sim. Daepio thuthanglatu cun KNU pawl thuhla a sut. Thu an suh lai ahcun ralhrang pawlin an let rero ko nan, a hnuah an kai. November 18 ah an rak kai zo ih, tuini tiang a thlah hrih lo,” tin a sim.
Ralhrang In Anmai Sakhan Nawkkang – Makui ramthen Miang myone Bahin khua ih mipi inn pawl cu November 21 ah ralhrang ralkap pawlin an urkang sak ciamco ih, mipi inn tampi a kang. Cumi hnu November 22 ahcun ralhrang pawl cun umhmun an khuarnak Bahin sakhan khal an urkang ih anmah ralhrang pawl cu an tlan cih tin Miang PDF cun mipi an theihter.
Miang pDF hotu Bo Lah Kyaw cun “Kannih Miang ahcun mipi ralkap pawl kan thazang a cak zetih nithum veikhat ralhrang pawl kan kap ringring. Cutikah Bahin sakhan ih ralhrang pawl cu an him lo zetih an um ngam nawn lo. Ralhrang pawl rapthlak zia cu an sakhan an urkang hlanah mipi inn an urkang ciamco hmaisa.
“Cumi hnu lawngah an sakhan an urkang ih anmah cu an tlan thluh. Ralhrang mipum 100 hrawng an si ih, an sakhan le mipi inn an urkang hnuah an suak. Mipi inn 52 hrawng an kang man. Ralhrang pawl cun an sakhan zeng palik pakhat thawng 10 an pe ih an tanta. Thu kan suh tikah ralhrang in hmunram an neh nawnl o ih, cumi ruangah an sakhan urkang in tlansuak an si tin an rel. Cucu, ralhrang ze ih phuanawk dan a si” tin a sim.
Miang in suak ralhrang ralkap pawl cu lamlak ah paditar bomb in an rak puah ih ralhrang 10 hrawng an thi thei tin an sim.
Maing PDF thuphuangtu cun “November 22, sun nazi 2 hrawngah a si ih, mipi inn urkangtu ralhrang pawl cu kannih mipi ralkap in lamzin ah bomb kan rak puah. Paditar bomb 8 in kan rak puah ih, ralhrang 10 hrawng an thi thei a si,” tin asim.
c– Mandalay ramthen Chan Mya tharsi myone ih inn thawng 5 umnak veng cu ralhrang ralkap in ramri nan lan tin an tthawnter ih umnak ding thei lo an tam.
A hmun ih um pakhat cun “November 21 ihsin inn bal dingah in theihter. Ramri nan lan, nan bal lole kanmah in cet in kan nor siat thluh thotho dig tin in hro. Curuqangah thenkhat cu mahte inn rak bal cia khal an um. Ziangtin kan um vivo dig tikhal kan rel thei hrih lo a si,” tin a sim.
Malaysia Hrilawknak Nehtu Um Lo – Kan dung zarh ih Malaysia hrilawknak ah Prime Minister hrang a zuamawtu pahnih lakah nehnak hrang vote hmu tling an um lo. Cumi ruangah party pahnih kop aw in hnatuan dingah ti an sinan, an duh lo ruangah Malaysia presidsent amah in Prime Minister a hril ding thu a sim.
Malaysia hrilawknak ahcun Prime Minister hlun Muhyiddin Yassin le Anwar Ibrahim an cuh aw ih, an pahnih in Prime Minister si theinak vote an hmu lo veve. Cumi ruangah Malaysia president cun party kop aw in rampi cozah din dingah a forh rero nan, an duh lo.
Malaysia president in palai pawl remnak tuahpi a tum rero nan, remnak a tuahpi theih lo tikah Malaysia Prime Minister hrang amah in a hril fel ding thu mipi a theihter. Malaysia president cun “Malaysia Prime Minister hrang keimah in reilote hnuah lairelnak ka nei ding a si,” tin a sim.
Saudi Arabia In Argentina An Neh – 2022 FIFA World Cup Cu puai hrang Argentina le Saudi Arabia cu November 22 zanlam ah an lek ih, Saudi Arabia cun 2-1 in Argentina an neh.
Puai thok hnu minute 10 nakah Argentina Captain Leo Messi cun Argentina hrang penalty in goal hmaihruai a thun nan, Argentina in an caantha neihmi an hmang tangkai thei nawn lo ih, an sit goal mipawl khal offside laksak an si. Caan hrek hmaisa sawn ah goal dang a lut nawn lo. Caan hrek neta sawn minute 49-nak ah Saudi Arabia cun goal an thun ve ih, Argentina lam an remawk ma hlan minute 53 ah Saudi Arabia cun nehnak goal an thun bet.
Argentina cun goal thun ve rori dingin nasaten Saudi Arabia an nor ih, caantha khal an nei phah nan, an sit goal thei lo. Cutin caan a cem ih, Saudi Arabia cun 2-1 in Argentina an neh fel. Group C ah Saudi Arabia cun hmat 3 in hmai an hruai. Argentina cun World cup sungsuak lut thei dingin an group ih um Poland le Mexico an neh tengteng a tul thlang. Saudi Arabia cun World Cup group C puai ih Argentina an neh thei ruangah November 23 cu Public Holiday tin thu an suah. Cozah hnatuan siseh bulpak company ih hnatuan pawl khal rampi hruap ih cawl dingin thu a pe.
World Cup thok hlan tiang Argentina cun puai 36 tiang rori nehtu nei loin an feh tluang thei nan, World Cup an lek thok tiah Saudia Arabia in an rak neh. Hitin Argentina cun nehtu nei lo record an tuah reromi a cem. Puai dang ah Denmark le Tunisia goal um loin an duhtawk ih Mexico le Poland khal goal um loin an duhtawk aw ve. Duhtawk aw pawl cu hmat 1 veve an then aw.
November 23, Myanmar caan nazi 4:30 ah Marocco le Croatia, Nazi 7:30 ah Germany le Japan, Nazi 10:30 ah Spain le Costa Rica pawl an lek ding.
Leave a Reply