Chin ramkulh Falam peng Rihkhawdar vengthen Tio tlangih ralhrang sakhan cu August 10, zinglam nazi 2 hrawngah mipi ralkap komkhawm in an kap ih, Nazi 7 hrawng tiang khat le khat an kap aw.
Doawknak a um hnuin Rikhawdar ih ralhrang hmunpi cun Tio ih doawknak hmun lam cu phukpi in an kap ciamco ih, mipi thih phah an um. Rihkhawdar ih ralhrang hmunpi cun anmah ralhrang pawl khal thi haiseh poi lo tivek deuh in phukpi an kap ciamco. Cumi ruangah kalaymyo Hmunlai vengin Tio ah thilzuar ih mi pakhat cu ralhrang kahmi phukpi in a ngah ih a thi.
Zinglam nazi 9 hrawngah ralhrang raldonak vanzam in Tio le a kiangkap a heel ciamco. Doawknak ruangah mipi tamzet cu Mizoram lamah an tlan.
Tio ih um pakhat cun “August 10, zinglam nazi 2 hrawngin puak awn kan thei thok zo. Mipi ralkap lamin Drone in Tio ih ralhrang sakhan bomb an thlak ih, an thlak fuh tuk tiah ralhrang thi an um rori ding. Zinglam khuavan hnuah doawknak a sosang deuhdeuh. Rikhawdar ralhrang hmunpi cun duhduh in phukpi an kapsuak ciamco ih mipi lamin siseh mipi ralkap lam khalin hriamhma ngah le thi an um.
“Mithi cu Hmunlai khua in Tio ah thil zuar ih ra thleng a si. Hriamhma ngah pawl cu Mizoram lamah tuamhlawm dingin an fehpi hngal. Puak awn phunphun a reh hnuah ralhrang raldonak vanzam cun Tio le a kiangkap an hel ciamco. A thok ahcun ralhrang raldonak vanzam cu sang tukah a zam nan, neta ahcun niam deuh in a zam ih, mipi ralkap pawl umnak a hawlin a lang. Tuhrih tiang ahcun ralhrang raldonak vanzam in bomb a thlak hrih lo. Doawknak ruangah khua mipi pawl cu Mizoram lamah kan tlan hrih a si,” tin a sim.
Tio Ih Doawknak Thu Ah CDM Siyin cun “August 10, zinglam nazi 2 in nazi 7 tiang Tio tlangih ralhrang sakhan kan do ih, ralhrang ralkap 5 an thih tlunah ralhrang tampi hriamhma ngah an um. Ralhrang 4 khal mipi ralkap lamah an ttang ih kan hnenah an pe aw. Doawk thluh hnuah ralhrang raldonak vanzam a zamkual kan hmu. Kannih mipi ralkap komkhawm lamin CDM Siyin sungtel pakhat hriamhma a ngah ih, midang cu kan him thluh a si,” tin thu an suah.
CNDF cun “Chin ramkulh Falam peng Rikhawdar khua vengthen Tio tlangih ralhrang sakhan cu August 10, zinglam nazi 2 in nazi 7 tiang hrawng kannih CNDF, PDF Zoland, CDM Siyin le MEDF pawlin naitein kan va kap. Doawnak ah ralhrang 5 an thi ih, Battalion Commander ralbawi Wai Myo Pai khal ralhang thi lakah a tel. Ralhrang tampi hriamhma ngah an um ih,kanni mipi ralkap komkhawm lamin bese tuk lo hriamhma ngah pakhat a um ve a si,” tin thu an suah.
Mipi ralkap lam cun August 2 in 4 tiang Tio ih ralhrang sakhan cu zan ah drone in bomb an rak thlak rero zo. August 6 khalah zan nazi 12 hrawngin zinglam nazi 5 tiang Tio ih ralhrang sakhan bomb an thlak. Curuangah Tio tlangih ralhrang pawl cu Rihkhawdar ralhrang hmunpi lamah an rak tlan thluh lawk nan, Tio ah an kirsal. Cumi hnuah mipi ralkap lamin August 10 zingah Tio tlangih ralhrang sakhan cu drone in bomb an thlak ih an kap salmi a si.
Leave a Reply