Ralhrang ralkap in rampi thuneihnak an lak hnuah tlawng zirhtu tamzet cu ralhrang uknak dokalh in CDM an tuah ih, ralhrang tlawng ah cazirh an tum lo.
Asinan, dothlengnak caan kum 1 a liam hnu khalah ram buainak a fel thei hrih lo ih, ralhrang cun 2022/23 hrang rampi huapin tlawng an phuan. Cumi ahcun CDm tuah pawl pe aw dingin ralhrang cun an sawm, an lem ih, mahte pe aw pawl cu an ngaitiam ding thu an simthei.
Ralhrang cun CDm tuah nan, thinlung thlengsal ih, tlawngkai duh zirhtu pawl cu June 14 tiang pe aw dingin caan an on ih, ramsung hmun tinkim in CDM hlitsal tampi an um. Chin ramkulh Tonzang lawng khalah CDM hlitsal zirhtu 223 an um ih, June 7 ah ralhrang in lomluhnak an nei.
Chin ramkulh fimzirzung hotu cun “Tonzang ahcun June 7 ah CDM hlitsal zirhtu 223 an um. Rampi huap in June 14 tiang CDm tuah pawl caan pek an si. Tuih CDM hlitsal pawl cu a tam kan tilo ih, a mal lam. Neta ah ziangzat an tam ding ti cu rel theih hrih lo a si,” tin a sim.
Chin ramkulh Falam ahcun CDM tuah tlawng sayamah pahnih cu ralhrang ralkap in June 3 ah an rak kai ih, June 8 tiang ralhrang lamin an thlah hrih lo.
Ralhrang in Falam khua ih CDm tuah zirhtu an kaihmi cu suakthuan tlawng zirhtu Suh Kan Thang le lailak tlawng zirhtu Sayamah Van Sui tei pahnih an si. An pahnih in Falam khawpi ah-htah-kah 1 in CDm tuah an si.
Falam khawpi ah tlawngkai dingin hminpe tlawngta 400 tluk an um ih, a takin tlawngta 300 hrawng tlawng an kai tin mipi cun an sim.
Ralhrang In mipi 11 An Kap That – Ralhrang ralkap cun Sagaing ramthen Kani myone sungin Chindwin tiva kapih um pawl cu June 5 in an rak luhcilh ih, june 8 ahcun ralhrang in mipi 7 an that zo.
Ralhrang cun Kani peng sungin ni 27 sungah khua 18 in mipi inn 1053 an nawkkang ih, mipi 7 an kaih hnuah an kap that. Mipi an kah thatmi pawl cu felfai ten mipi an vuiter lo ih, an kah thatmi pawl ih ruang khal an nawkkang vivo tin Kani PDF cun thu an suah. Cucu, ralhrang pawl an suahfel hnuah mipi ralkap le khua mipi pawlin ralhrang thahmi pawl an hmufang.
Khuami pakhat cun “Ralhrang pawl an um nawn lo hnuah mipi an thahmi pawl cu hmuhfang an si. Hrekkhat cu theihtheih nawn lo an si ih, hrekkhat cu an ruang khal hmuh ding um loin an kawkkang thluh. Inn an kawkkang rualin ruang an nawkkangmi khal a tam,” tin a sim.
Sagaing ramthen Minmu peng khalah ralhrang ralkap cun an kaihmi mipi 4 pawl cu an tlanter ih dunglam in an kap that vivo.
Khuami pakhat cun “Kan khua kiangih lut ralhrang pawl cu PDF lamin bomb 3 in an rak puah. Cunah ralhrang thi an tam ding. Sun nazi 1:30 hrawngah ralhrang mipum 80 cun kan khua kiangkap an luhcilh thokih, khua luh hlan khawlu thlam an nawkkang hmaisabik.
“Cumi hnuah khawsung an lutih, mipi tlan man lo pawl cu an kai. Ralthuam nei lo, khuami mino 4 pawl cu, ‘nan zalennak hrangah tlan uh,’ tiah an auh ta ih ramtawipa in ramsa a kah men bangin an dunglam in an kap that hai.
“Kan khaw pacang pakhat cu a kedam a thlau ih a sarzawng ah a kun. Cumi cu ralhrang pakhat in a hmu ih, ‘na tlansuak tum mawsi’ tiin a kaa angter in a kaa sungah meithal a hmawmter. Cumi hnuah meithal a hmet puak.
Cun, nunau pakhat cu a dip sungih thil um zaten an phorhter. Sui le sumpai tam zet an laksak. A sui neihmi le sumpai an laksakmi hi ting 100 lai a si ding,” tin a sim.
Makui ramthen Yesagyo myone singyo khua kiangih doawknak khalah ralhrang ralkap le Pyu Saw Htee tangtlang cun PDF an kai ih, PDF 3 an kaihmi pawl cu an thah hnuah an nawkkang fel zo tin Taung Lat PDF cun thu an suah. Taung Lat PDF cun ralhrang le Pyu Saw Htee pawl ih thahmi PDF 3 cu upatnak an pe ih, an sungtel rualin an tuarnat thu an tarlang.
Palik Sakhan An Do – Makui ramthen Pakukko myone Kyat Hto palik sakhan cu June 8 zinglam nazi 6 hrawngah PDF pawlin an do ih, nazi 1 sung an kap aw.
Ralhrang palik sakhan lam khalin ralthuampi thawn ttan an rak la ve ciamco ih, palik sakhan la fel tum rori in PDF lam cun an do nan, hmundang in palik pawl bawmtu ralhrang an thlen bet tikah palik sakhan la fel man loin an um.
Cumi rualin palik sakhan bawm dingih feh ralhrang pawl cu lamlak ah bomb an puah ih,palik sakhan ih an doawknak thawn ralhrang 20 hnakin mal lo an thi ding tin PDF cun thu an suah.
Doawknak ah PDF pakhat a thi ve ih, palik sakhan an la fel man lo nan, palik pawl umnak inn tampi a siat phah tin Pakukko PDF cun an thusuahmi ahcun an tarlang.
Kaya ih doawknak ah ralhrang 26 an thi – Kaya ramthen Loikaw , Demoso, Pruso le Moebe pawl ih zarh khat sung doawknak ah ralhrang 26 an thi ih, ralhrang mawtaw 2 kan laksak thei tin KNDF cun mipi an theihter.
KNDF cun “June 2 in ralhrang ralkap cun mipi khal ruat loin in nor ih, duhtawk in mipi umnak ah ralthuampi khal an kap ciamco. Curuangah, June 2 le 3 ah kannih mipi ralkap cun ralhrang ralkap pawl kan do. June 4 khalah Loikaw in Demoso lamih feh ralhrang ralkap thawn kan do aw peh.
“June 5 le 6 khalah ralhrang ralkap thawn kan do aw peh hrih. Pruso in Bawlake lamih feh ralhrang mawtaw 40 kiangkap cu June 1 in 3 tiang kannih KNDF le KA cun kan kap. Cumi ah ralhrang mawtaw 3 a kangih, ralhrang mawtaw 2 kan lak thei tlunah ralthuam hrekkhat khal kan laksak thei.
“June 7 khalah Loikaw in Moebe lamah ralhrang pawl an feh ih, kannih mipi ralkap pawl thawn sunvu deuh thaw kan do aw. Ralhrang pawl cu Moebe ah umhmun an khuar ih, duhtawk in ralthuampi an kah ruangah mipi 2 an thih phah, hriam ngah 3 khal an um.
“June thla hmaisabik zarhkhat sungih ralhrang thawn kan doawknak zaten ah ralhrang 26 an thi. Doawknak ahcun kannih lamin miraltha pakhat kan can ve ih, upatnak kan pek hnuah miraltha thuanthu ah kan ngankhum a si,” tin thu an suah.
Kum 2 Nauhak In A Pa Kap That Ngah – US ram ah kum 2 nauhak pate cun a meithal hmanmi in a pa a kap that ngah ih, thilthleng ruangah a nu cu kum 15 sung thawngtla dingin hremnak pek a si.
USA, Orlando ih inn pakhat ah sungkhua khat caan an hmangtlang ih puak awn an theih tikah a va zoh cu an innsangpa meithal kahnak hliamhma thawn innsung ih a thi an hmu. A sungte pawl cun pabik cu runsuah an zuam nan cuihhmun ah nunnak a cemfel cih.
Thlilthleng ruangah palik pawl cun insangnu le fate pawl cu thubuai an tuahsak ih ,Court ah thu an sut. Thuthennak zungih hmuhsuakmi vek asile kum(2) nauhak in meithal pakhat a hmu ih rinlopi in a Pa a kap that ngah tin a upa kum (5) mi cun Court ah a rel. Curuangah amah kilkhawitu a Nu, Marie Ayala cu kutsung meithal ken ruangah le nauhak kut sung tiangih meithal a thlenter ruangah kum 15 sung thawngtla dingin hremnak an pe.
Peng ralkap bawi John Mina cun “Nauhak pawl in an Nu le Pa an sungral. An Pabik a thi ih, an Nubik khal thawnginn ah a um. A nauhak tet laiah a Pa a that ngah timi theihnak thawn a thanglian vivo ding cu a si” tin a sim.
Leave a Reply