UFC Ah Chinpa Joshua Van Kan Hmu Ding

UFC Ah Chinpa Kan Hmu Ding – Fury FC Champion Chinpa Salai Joshua Van cun UFC ah mi a sual ve ding thu February 27 zingah mipi theihternak an nei.

Joshua Van cun “Neta ih mi ka sualnak ding hmun cu UFC ah a si ding,” ti’n a sim. UFC hi sumpai hmangin leitlun ih sualawknak um lakah a sangbik le hlawh thabik an peknak hmun a si ih, Myanmar dinhmun in siseh Chinmi dinhmun khalin UFC lut thei zohman an um hrih lo. Curuangah Johsua Van hi thuanthu ah Myanmar hmin in siseh Chinmi dinhmun khalin UFC thawn contract ngan hmaisabiktu a si.

Joshua Van hi Amateur sualawknak ah vei 4 peh in nehnak a rak co thei ih, cumi hnuin Pro Fight ah a rak lut thei. Pro Fight ih a luh hnuah puai 2 nehnak a co hngal nan, a puai thumnak a rak duai. Asinan, beidong loin a sual peh tikah puai 4 a pehin nehnak a co thei ih, a puai nganak ah Champion taikhap a cuh thei. Pro Fury Fight Flyweight Champion taikhap cuhawknak khalah a sualpi a neh thei ih 2022, December 18 ah Fury Flyweight Champion taikhap a rak ngah.

Champion taikhap a kol hnu cun a hrang sangka a ongaw cih ih a sangsawn sumpai umnak zuamawknak pawlin an hnenih lek dingin an sawm celcel. Cutikah amah Joshua Van cun mipi hnenah ruahnak a dil ih, UFC ah maw? One Championship ah ka lek ding ti’n mipi a rak sut.

Mipi cun UFC hi leitlun sumpai hmangih sualawknak ah a sangbik a si ih, UFC ah lut sawn ko aw. UFC ih na lek hnuah One Championship khal na duh ahcun na lut theisal ding. One Championship ahcun Aung La Nsang le Salai Tial Thang kan nei zo,Nangtal cu chin miphun le Myanmar mipi theihhlawh dingin UFC ah lek ko aw ti’ thuron an rak pe. Mipi thuron tamzet a don hnuin amah Joshua Van rori cun February 27,2023 ah UFC ih a lek ding thu mipi a sim.

MMA ih a sulhnu hminsin an retnak ah mi 8 a sual zo ih vei 7 nehnak co in veikhatte a duai. Mi a nehnak pawl zoh tikah thonglet le ret bet tivekin nehnak a co tam. Amah cun kick Boxer cikhat ka si ti’n a rel aw. UFC ahcun til le lu bat hrim ti lo ahcun kut le ke duhtawkih hman theih a si.

Tu ah Joshua Van hi kum 21 mi a si ih pi 5 le zungpi 5 a sang. Chin ramkulh Hakha peng Ruan khuami a si ih Raltlan dinhmun in US rak feh hnuah tu ahcun US Texas ah a um. Joshua Van timi tlunah Fearless ( Tih nei lo) timi hmin a kengtel.

Amah Joshua Van cun “Zuamawknak hi ka paih ih theitawkin ka zuam. Daan le dun felfai zetin ka neihmi hi midang thawn kan bangawklonak a si ve. Tu ih ka tumtahmi cu UFC ih hlawhtlin le UFC thuanthu ah misualthiam hminthang ti ih thuanthu kan neih ding cu a si. UFC ah tel ve dingin ka man zo ih, sualawknak ropi zet a si ding,” ti’n a sim.

Tu ah Joshua Van in UFC ah a tel ve ding thu le UFC thawn contract an ngan thu mipi a theihtermi a si ih, UFC ah zothawn an sual aw ding,ziangtikah timi cu mipi theihternak a nei hrih lo. UFC tuanvo neitu pawlin Joshua Van hrang puai an tawlrel sak dingih puai an tawlrel sakmi a fel hnuah mipi an theihter leh ding.

Tui dinhmun UFC Flyweight rihnak dinhmun ih Champion cu Mexico misualthiam Brandon Meremo a si ih, 2023, January 22 fangah Champion taikhap a rak si thar. Joshua Van hin UFC ah Champion taikhap a cuh thei hngal lo dingih puai dang mi a sual dan dinhmun an zoh hmaisa ding. MAA tivek ahcun puai 4,5 a peh in nehnak an co thei cun an hrangah puai thupi an tuahsak tlangpi.

Myanmar ram dinhmun in One Championship ah leitlun huap Champion taikhap la thei Aung La Nsang kan nei zo nan, tutak fang ahhin Aung La hin One Championship ah taikhap kolmi a nei lo ih, taikhap kol theisal dingin a zuam rero lai. Chinmi dinhmun in One Championship ah Salai Tial Thang a lek ve nan, tuhrih tiang ahcun amai rihnak hmun khalah Champion taikhap cuh ban khopin a lek thei hrih lo. Johsua Van hi beisei um zetih an relmi a si ih, Myanmar mipi ,Chin mipi siseh leitlun MMA mipi pawl cun UFC ih mi a sual ding an hmu cak tuk zo.

Online Passport An Kharsal – Ralhrang in February 24 ah Online in Passport dil a theih thu mipi thannak an nei ih, diltu an tam tuk ruangah an buai phah in a langih February 27 zing ahcun Online passport dilnak an khar hrih thu mipi theihternak an nei.

Ralhrang cun “February 24 ah Online Passport dilnak kan rak ong ih a diltu le sumpai a pe zotu lakin a ni kan lo tuahsakmi felfai zoh dingah kan lo theiter duh. Sumpai pe lo cu a ni kan lo tuahsak ve lo. Dil zo nan, sumpai pe hrih lo pawl sumpai peh dingin kan lo theither. Mithar hrang ahcun thil buaipimi kan neih lai ruangah kan khar hrih ih a thei veten kan lo theither sal ding a si,” tin an sim.

Passport diltu pakhat cun “A khar lanta ding cu a si hmello, a diltu an tam tuk tikah an buai tukih a dil zotu pawl buaipi fel hmaisa an tum a si ding. Curuangah a dil duh cun a dilnak Website cek ringring sehla thuhla an thlah ringring ko. February 24 in 26 tiang lawngah online in Passport diltu 8529 an um man. An neh lo ruangah siko ding,” tin a sim.

Ralhrang in Online Passport cu Yangon zung densen lawngih an onmi a si thu an sim ih ramthen le ramkulh ahcun a hlan bangin a kelten a feh thu an sim.

Ralhrang 16 An Thi ih PDf 5 An Thi – February 26 , Myanmar rampi huap doawknak thu an suahmi ah ralhrang 16 an thi ih PDF 5 an thi ti’n hmuntin ih PDF pawl cun mipi theihternak an nei.

Sagaing ramthen Ayadaw le Minmoe karlak ih doawknak ah ralhrang 3 an thi ih, Ayadaw ih doawknak ah ralhrang 2 an thi. Sagaing ramthen Mungzua ah ralhrang pakhat an thianfai ih, Minmoe ah PDF pahnih an thi. Makui ramthen Maing myone ih doawknak ah ralhrang 3 an thi ih, Gangaw ah ralhrang pakhat an thianfai thei. Chin ramkulh Mindat peng sungah CDF mindat pakhat mual a liam.

“Mandalay ramthen Min Gyan ih doawknak ah ralhrang 3 an thi ih,Mataya ih doawknak ah ralhrang 1 a thi. Bago ramthen Yitasi ih doawknak ah ralhrang pakhat a thi ih, Ukphu ah PDF pahnih an thi. Tanintharyi ih doawknak khalah ralhrang pakhat a thi ti’n PDF pawl cun February 26 doawknak thu an suah.

Min Aung HLaing In A Kuthnuai Pawl Thu A Cah – A tufang Myanmar ram buainak ah ralhrang sunglam khal nasaten an buai ve ih khat le khat thupek thlun lo ruangah kap aw, ralhrang tlan tivek a um ringring. Cumi thawn pehparaw in Min Aung Hlaing cun a kuthnuai pawl thusimnak a nei.

Min Aung Hlaing cun “Daan timi cu kannih ralkap hrangah kan zangruh pakhat vek asi ih, ralkap dan kan thlun lawngah ralkap tha kan si ding. Rampi himnak le mipi himnak hrang hnatuan kan si cun daan kan thlun tengteng a tul. Daan kan thlun that cun thupek khal kan thlun tha cih.

“Daan timi cu hna thaten kan tuah theinak dingah kan tuahmi a si ih, daan kan tuah tikah theithiam ding khal kan si. Daan kan thlunnak in kanmah le mah kan khaisang aw. Khat le khat rualremten um ding kan si ih, tlunlam thupek thlun ding khal kan si,” tin a sim.

Ralhrang ralkap hotu Min Aung Hlaing in hivek in thu a suahnak san cu ralhrang lakah daan thlun lo, tlunlam thupek thlun lo an tam vivo ruangah a si ti’n CDM ralbawi Victor cun a sim ve.

Karen ah ralhrang bawi 4 cun tlunlam thupek an thlun lo ih KNU do paih loin an um. Cutikah ralhrang bawi 4 pawl cu kaih an si ih, thubuai an tuahsak. Ralhrang gate duty caan khalah thupek thlun lo ruangah anmah le mah an kap that aw rero zo.

NUG In An Ram Lakmi Dinhmun An Sim – NUG lailak president Duwa Lashila cun a tufang ramsung ih an dinhmun mipi theihternak a nei ih, tlangpar ralthuamkai le PDF pawlin ramsung hmuntam an luahkhat zo thu an sim.

NUG Lailak president Duwa Lashila cun “Myanmar rampi sungin hmun tamsawn hi tlangpar ralthuamkai le PDF pawlin an luahkhat zo. Hmunram kan luahkhatmi lakin Chin ramkulh sungah zatekin 80% tluk a si ih,Culo hmundang cu Sagaing ramthen, Makui ramthen, Kachin ramkulh, Kaya ramkulh le Karen pawl an si. Tu ih ka simmi hmun pawl ahhin ralhrang in khawpi lawng an luah thlang. Culo peng sungih khua pawl cu mipi ralkap kutah a um.

“Hmunram kan ciahnehmi sungin myone 154 ah mipi uknak kan din zo ih District 9 hrawng an si. Tlangpar ralthuamkai pawl umnak lakin ralhrang pawl feh ngam nawn lonak myone 78 an um ih cupawl khalah mipi uknak din a si. Myone 198 ah mipi fimzirzung on zo a si ih,Myone 21 ah thuthenak kan fehpi zo. Daan zung 23 kan ong zo ih thuthennak Court 25 kan ong zo a si,” ti’n a sim.

Myanmar Ramri Ah Palik Gate An Tuah Bet Ding – Manipur CM Biren Singh cun Myanmar mipawl duhduh in Manipur lamih an luh theilonak dingah India le Myanmar karlak ah Palik Duty gate 34 tuah bet a si ding ti’n mipi simthannak a nei.

Manipiur CDM cun “Kannih Manipur State thu menih lairelmi a silo, Home Affairs hnenah dilnak kan nei ih siannak kan ngah zo. Kannih Manipur ram hi Myanmar thawn ramri km 398 ka nei. Hmun thenkhat cu felfai zetin ramri tuah a sinan, hmun tamsawn cu ramri khal felfai zetin tuahmi a um lo.

“Myanmar ram a buai hnuah Myanmar mipi tamzet Manipur State sungah an lut. Tutiang ah daan loin Manipur sungih lut Myanmar rammi 393 kan kai zo ih pakhat cu ramdang ah kan dawi. Kaihmi lakin mipum 107 pawl cu daan vekin Court ah an thuhla rel rero lai a si ih, kaihmi lakin mipum 105 pawl cu ramdangmi retnak hmunah kan ret. Kaihmi lakin mipum 180 pawl cu kan suahsal zo an si,” ti’n a sim.

Manipur hin India cozah thusuak an ttawmpi ih an state sungah Myanmar raltlan umter an siang lo. Kan dungah an state sungih um Myanmar raltlan pawl card tuahsak ding vekin an sim nan, a hnuah Myanmar raltlan an kaihmi pawl cu Myanmar ah an kuat kirsal ding thu an sim leh zo. A cangvaih dan zoh tikah Myanmar raltlan hmu thei lo zet le ngaih lo zet an si.

Jordan In Israel Le Palestine Thu A Relpi – West Bank ih Israel le Palestine buainak thuhla ah Jordan cun ram pahnih karlak ah remnak um thei beisei in thu a relpi ih, thurelnak ahcun US palai le Egypt palai khal an tel ve.

West Bank ih um palestine tapung pawlin Israel an tibuai ruangah Israel cun West Bank sungih khua pakhat Nabus an kap ih Palestine mipi 11 an rak thi. Tuitum cu Israel in 2005 hnuah West bank ih Palestine mipi an thah tambik ttum a si. Tui kum sung lawngah ISrael le Palesltine doawknak ruangah Palestine lamin mi 62 an thi zo ih, Israel lamin mi 10 an thi ve zo. Karlak ah Ukraine khualtlawng pakhat khal a thi.

Ni kum sung West Bank ih doawknak ah Palestine lam mi 171 an rak thi ih ,mithi lakah nauhak 30 an tel. Palestine ram sung ahhin tapung pawlin ramthen ukmi hmun 2 an nei ih, cumi sungih um Tapung pawl cun Israel an kap, ISrael ah thicilh bomb an puah ih ISrael an tibuai ringring. Cumi ruangah Israel in Palestine ram sung West Bank le Gaza a kap ringring phah ve.

Jordan in ram pahnih thu a relpimi cu buainak reh dingin le khat le khat remawknak um dingin a si ih, buaknak sosang sinsin lo dingin ram pahnih biakrem an tum. Ram pahnih in hmaiton ih thurel an duh hrimhrim hi hlawhtlinnak cikhat a si zo ti’n Jordan lam cun an sim.