Zomi Army ZRA cun mipi thawn tuantlang in hmunram an kauh vivo ding thu le uknak an fehpi vivo ding thu mipi theihternak an nei ih, tlawnginn le sizung siatsuah tumtu khal kan dim lo ding a si tin thu an suah.
ZRA thusuah cu hitin a si, “Kannih Zomi Army cun Zogam sungah uknak thasawn fehpi vivo dingin tumtahnak kan nei ih, mipi thawn reltlangnak khal kan nei vivo ding. Kum 2 lenglo tlawngkai thei lo ih um, kan naule pawl zawn ruatin tlawng an phuanmi khal kan lungkimpi tuk timi kan phuang nonsal duh.
Zogam sung Tedim peng Cingpikot khua khalah kan feh ih, an mino hrekkhat cun in rak zuk tlunah kan zuk pawl khal kan siannak tel loin ralthuamkai hrekkhat hnenah an kuat. Cingpikot khua mino pawl cun ralthuamkai dang pawlkom an dinpi ih, cupawl thawn tangrual in an khua tlawng phuan thei lo dan an tawlrel.
“Tlawng phuan dingih thleng zirhtu pawl khal an tlungter sal ih,a phunphun in an hro. Hivek ih an cangvaihnak cu tlawngkai a tha timi kan thusuahmi ziang siarlonak a si ruangah cuvek ih tanlatu pawl cu kan kai ih,thusuhnak kan neih hnuah kan thlahsal zo. Cupawl cu tlawngkai duh lo CDM pawl an si tin kan thei.
“Kannih ZRA cun CDm tuah siseh tuah lo khal Zomi hrang kan cangvaihnak khamtu hrimhrim cu kan thungrul cih ding. NUG cozah khalin tlawng le sizung siatsuah an duh lo thu an rak suah zo. Curuangah kannih khalin Zogam sungah tlawng le sizung siatsuahtu pohpoh cu a tuldan vekin kan thungrul ding a si,” tin thu an suah.
Cingpikot khua cu Tedim in peng 18 hrawng hla khua ah an um ih, suanthuan tlawng ngah an si. An khua ih CDM 3 cu ZRA pawlin an kaih hnuah an hrem ciamco ih, pakhat tla cu amah ten a feh thei nawn lo. Cumi tlunah tlawng nan kai cuang lo ding asile khua in suak uh,culole kan lo that ding tin an sim bet.
Ralhrang ralkap in rampi thuneihnak an lak hnuah Myanmar ram sung hmun tinkim in mipi ralthuamkai pawlkom an ding celcel. Tedim le Tonzang khalah mipi ralthuamkai an ding ve ih, ZRA cun Tedim le Tonzang ah ralthuamkai dang zohman nan um thei lo tin ralrinnak a rak pe.
ZRA cun thu an suah hnuah PDF Zoland sakhan, CDF Hualngoram sakhan le tuansung mipi ralkap sakhan pawl an rak siatsak zo ih, CNA thawn khalin an do aw rero zo. Hivek ruangah Chin ralthuamkai pawlkom CJDC cun ZRA cu ralhrang pawlkom an si tin April 12, 2022 ah thu an rak suah ve zo.
Ralhrang In CDF An Kaihmi An That – Ralhrang ralkap cun June 20 ah Matupi peng Rezua khua ah CDF sungtel Sung Fua an rak kai ih, June 21 ah a thi tin a sungte pawl an theihter.
Ralhrang ralkap cun an kaihmi CDF sungtel Sung Fua cu mihremnak hmunah an hrem, thu an sut ciamco ih, an hremnak hriamhma tuar loin Sung Fua cu a thi. Ralhrang ralkap pawl cun an hrem that rorimi cu a sungte pawl hnenah amah le mah a that aw tin an simthei.
An sungte pakhat cun “June 20 ah an kai ih, June 21, zanlam nazi 6 hrawngah a thih thu in simthei. Thawnginn sungah amah le mah a that aw in ti. Asinan, cuvek a si lamlam lo ding. Anmah ralhrang pawl ih hrem thatmi a si,” tin a sim.
Leave a Reply