ZRA In Tlawngkai Khamtu Pawl An Hrem Ding

Zomi Army ZRA cun a tufang ralhrang ralkap ih phuan tummi tlawng cu fimzirnak hrang tha tuk a si tlunah NLD cozah san ih zirmi thotho a si ruangah tlawngkai tha an ti thu, tlawngkai tibuaitu pawl cu a tul dan vekin hremnak an pek ding thu mipi an theihter.

ZRA cun “2022, June 2 in Myanmar ram sungah KG in phun 11 tiang tlawng an phuansal dingih, NLD cozah san ih zirmi pawl an zir peh ding tin thuhla kan thei. Hivek cu kan tefa hrang hmailam ih thiltha a si ding tlunah rampi mawinak ding a si ih, kannih Zomi Army ZRA cun tlawng phuan ding cu kan lungkimpi.

“Covid 19 natnak ruangah le Myanmar ram buainak ruangah kum 2 sung rori fimzir thei loin um nauhak pawl an um zo ih, tui kum ah a takin fimzir dingah kan duhsakih, kannih Zogam sungih um tlawngta pawl cu fimzir peh dingin kan forh duh.

“Cuvek rualrual in ziangvek pawlkom khalin Zogam sungih fimzirnak innpi, sizung le harhdamnak innpi pawl siatsuah, tisiat lo dingin le tibuai lo dingin kan lo simthei duh. Cuvek siatsuah nan um asile dankalh pawlkom ah kan lo phuang dingih, a tul dan vekin hremnak kan lo pe ding. A tul asile leitlun daan vek khalin hremnak kan lo pe ding a si,” tin thu an suah.