Chin miphun humhimtu CNDF cun kalaymyo Tahan vengih ralhrang ralkap thawn an doawknak thuhla tlunah Falam peng Zawlpi khua ih thiltheng pawl cu may 30 zan ah mipi theihternak an nei.
CNDF cun “Kalaymyo Taungphila lamzin pialnak ih umhmun khuar ralhrang ralkap pawl cu May 28, zan nazi 8 hrawngin nazi 10 tiang kannih CNDF, CSS, UG, PDF Kalay tatyin 8, Kalay PDF tatyin 12 le GRF pawlin kan va kap.
“Ralhrang umnak hmun kan kah tikah ralhrang 2 an thi ih, ralhrang 3 hriam an ngah. Ralhrang ralkap cun duhtawk in ralthuampi an kap ciamco ih, Tahan ih um mipi 3 an thi.
“May 29 ah Chin ramkulh Falam peng Zawlpi khua ih feh CNDF miraltha pahnih cu ralhrang ralkap pawlin an kap ih, Zawlpi khuami pakhat le CNDF miraltha pakhat an thi. Zawlpi khuami pakhat le CNDF miraltha pakhat ih ruang cu ralhrang ralkap pawl in an urkang. CNDF miraltha pakhat khal hriam a ngah.
“CNDF miraltha Salai Van Lal Buat Saih ( kum 36 ) cu May 29 ni ah amah ih tiamkamnak a tuah vekin Kalay peng ralram hmun pakhat ih mine cangsualnak ruangah ram le miphun hrang a nunnak a cem. CNDF Miraltha Salai Van Thawng Awi ( kum 32 ) khal amah ih tiamkamnak a tuah vekin May 29,2022 ni ah Kalay peng ralram hmun pakhat ah raldo in ram le miphun hrang a nunnak a hlan.
“Miphun dothlengnak hrangih an pumpekawknak parah CNO/CNDF cun upatnak sangbik kan pe ih, tantami sungkua pawl thawn bangrep in kan tuar tuk. Chin paraltha Kan miphun ralkap Salai Van Lal Buat Saih le Salai Van Thawng Awi, ram le miphun hrang nan pumpekawknak le na ruahsannak pawl hi na tantami na tuanpi CNO-CNDF pawlin kan hngilh dah lo dingih thahrum hmangin thuneihnak a cuhtu ralhrang ralkap pawl an cimit theh tiang kan run do ding a si tiah a feh liamzotu na tuanpi paraltha pawl le nan hminsal in thu kan lo kam a si,” tin thu an suah.
Champhai Ah CDM Palik A Thi – Myanmar ram buainak ah mipi lamtang in CDM tuah palik Lal Biak Thang ( kum 28 ) cu Mizoram , Champhai khawpi ah a umnak inn sungah thi cia in may 30, sun nazi 12 hrawngah a ruang sar a si.
Palik Lal Biak Thang cu 2021, March 4 ah palik a tuannak Falam khawpi palik zungin CDM a rak tuah ih, a nupi fanau thawn Mizoram , Champhai khawpi ah an rak tlan. Palik le ralkap dinhmun in CDM tuah tikah an hrang Myanmar ih um peh ding cu a him lo tukih, cumi ruangah Champhai ih rak tlan an si.
Ziangtin, ziangruangah CDM palik Lal Biak Thang a thi timi cu felfei zetin theih a si hrih lo ih, May 30 zing ahcun Lal Biak Thang a luak rero lai cu kiangkap venghnen pawlin an thei. Tuini May 31 ah vuinak an nei ding. CDm palik lal Biak Thang cun a nupi le fate thla 6 mi a fehsan.
Paletwa Ah Bomb Palpuak Ngah – Chin ramkulh Paletwa myone Nga-sia khua ih um pakhat cun lo a fehnak ah bomb kammi a palpuak ngah ih a ke pakhat an tansak.
May 28 zinglam nazi 7 hrawngah nufa hnihte cu khua in nazi 1 hrawng fehnak an lo ah an feh ih, an tlunlam zanlam nazi 3 hrawngah a fapa cun lamzin ah bomb kammi a palpuak ngah. A nu cun a fapa cu a paw ih, ralhrang sizung a fehpi. Ralkap sizung cun a ke pakhat an rak tansak hnuah, lawngin Palewa sizung an fehpi ih zan nazi 10 hrawngah Paletwa sizung an thleng.
Paletwa sizung in Rakhine ramkulh Sittwe khawpi ah zohawter dingin an rak tthawn ih, may 29, zan nazi 5 hrawngah Sittwe sizung an thleng. Tu ah bomb palpuak ngahtu Salai Aung Aung cu Sittwe sizung ah tuamhlawm rero lai a si. A pa in a thihsan hnuah a nu thawm umtlang an si ih, an harsa ngaingai.
2015 kum hnuin Rakhine ralkap AA le ralhrang pawl Paletwa peng sungih an doawk ruangah Paletwa mipi tamzet cu khuate in Paletwa khawpi le Sami khawpi ah raltlan in tampi an um. Tukhalah raltlan thawng 10 hrawng cu an tlung thei hrih lo.
Ralhrang in rampi thuneihnak an lak hnuah Paletwa peng sung khalah ralhrang do dingin CDF Paletwa le Dai, Mara CDF an um ve ih ,ralhrang thawn an doawk ruangah Paletwa peng sungin India lamih tlan mipum thawng 10 hrawng an um tin an sim.
Ramhlo Zuknung Zohtu An Tam – Director Na Kyi tawlrelmi “Ramhlo” timi zuknung cu zohtu an tam zetih nazi 24 sungah zohtu Million an kim.
Ramhlo zuknung cu mipi lamtang CDM pawl tangrual ih an tuahmi a si ih, lemcang ah Daung le Paing Phyo Thu khal an tel. Pa Day Thar Pin timi Youtube channel ah ret a si ih, minute 9 sungte lawng a rei.
Zuknung cu a lakin zoh theih a si ih, Youtube in sumpai an ngahmi cu dothlengnak hrang an hman ding thu tawlreltu pawl cun an sim. Zuknung ih pholangmi cu Myanmar ram buainak ruangah raltlan nu pakhat ram nei lo dinhmun ih a umdan pholangnak a si.
Zuknung ih an tongmi cu mirang in let cih a si ih, ramdangmi pawl khalin an zoh. Ramdangmi pawl cun “Minute 9 sung reilote zuknung a sinan, Myanmar mipi nan tuarzia a langih, kan lo dinpi. Beidong hlah uh, beidong loih zuamtu pawl cu nehnak an co cingcing a si,” tin Myanmar mipi an hnemnak an ngan cio.
Leave a Reply