Ralhrang in rampi thuneihnak an lak hnuah Sagaing ramthen sungin PDF pawl cun tuini tiang theitawk in ralhrang ralkap pawl an do rero ih, Sagaing ramthen sungah ralhrang thi an tam.
Cutikah ralhrang cun nasa ten Sagaing ramthen sungih PDF pawl do an tum ve ih, an mithahmi pawl darhsuak lo dingin ralhrang pawl cangvaih an tum. May 24, zinglam nazi 6 ihsin Sagaing ramthen sungin myone 9 ah phone line le internet line a um lo ih, thim lakah ralhrang pawl cangvaih an tum.
Kanbalu PDF cun “Kannih lam cu zinglam nazi 6:55 in phone line pawl a siat thluh. Internet tla cu an phit deuh ringring siko. Asinan, ngah caan a um theu timen a si. Tu ahcun zianghman hman a theih nawn lo. 2G khal a lang thei nawn lo. Phone line tiang an phit tikah tum an nei timi a fiang tuk a si,” tin a sim.
Ralhrang in Phone line le Internet line an phihsakmi pawl cu Khin Oo, Minkin, Mungzua, Kyuan HLah, Yinmarpin, Pale, Kani, Kanbalu, Kawlin le Myintmu pawl an si. Ziangtik tiang phone line le Internet ngah loin an um ding timi cu theih a silo ih, thuhla a darh hnu sun nazi 1 hrawng ahcun myone hrekkhat in phone line an ngahsal tiah an sim. Asinan, a tha ciamco lo ih, myone tamsawn phone line ngah hrih lo an tam.
Bazar Kai Palik 3 An Kap That – Makui ramthen Yesakyo myome Mitaw khua ah ralhrang palik bazar kai 7 pawl cu PDF komkhawm pawlin lamlak ah an kap ih, palik 3 an thi tin an pholang.
May 23, zinglam nazi 10:30 hrawngah Mitaw palik sakhan ih palik 7 pawl cu bazar dingin an suak ih, lamlak ah PDF pawlin an rak do. Ralhrang palik pawl khalin an rak kap ve nan, PDF lam an him ih, palik 3 an thih thlunah palik 2 in hriam naa tuk an ngah ih, G3 meithal zunhnih le cerek an laksak thei.
Ralhrang palik pawl bazar kai ding rak kaptu PDF komkhawm pawl cu Bagan-Nyaung Oo PDF, MGN-Tiger, YSO.ISA, Black Wolf PDF-Mdy pawl an si.
Pago ramthen Hantharwaddy myone Gungmin Myaing khalah ralhrang pawl fang rialsak theutu U Myint Thein ih fangcet bomb an puah sak. Fangcet bomb puak ruangah a kiangih kungka mawtaw khal a siat phah.
Khuami pakhat cun “Zinglam nazi 3 hrawngah fangcet bomb an puah ih, nazi 6 hrawng ahcun ralhrang ralkap pawl an thleng cih. Bomb puak ruangah thi cu an um lo nan, cet sung thilri tampi a siat phah ding.
“Cet neitu innsangpa cu ralhrang thawn remawknak nei a si ih, a fapa khal ralhrang bawi thawn nuamcen ringring a si ve. Ralhrang pawl fangcet an pan lam khalah lamlak ah bomb an rak puah ih, hriam ngah an tam ding. Ralrinnak an pe rero nan, sim an theih lo ruangah hivek in an tuah siko,” tin a sim.
Pyu PDF le Hantawaddy PDF cun komkhawm in fangcet bomb an puah thu mipi an theihter ve ih, ralhrang tuanpi an si ruangah nunsimnak hrang an tuahmi a si thu khal an tarlang.
Pyu Saw Htee 5 An Thi – Makui ramthen Pakokku district Kyuan Chuang lamzin ah ralhrang le Pyu Saw Htee pawl tomi mawtaw cu PDF komkhawm in May 23 ah bomb an rak puah ih, ralhrang le Pyu Saw Htee 5 an thi tin PDF cun thu an suah.
Light truck mawtaw ahcun ralhrang le Pyu Saw Htee komkhawm 13 an to ih, May 23 sun nazi 1 hrawngah Kyuan Chuang PDF le an tuanpi pawl cun lamlak ah bomb an rak puah. Ralhrang le Pyu Saw Htee pawl tomi mawtaw cu a siat darh thluh.
PDF hotu cun “An ummen le vak men bomb kan puahmi a si ve lo, mipi hnenah ralthuam rinsan in sumpai an dil ih, nomcennak ah an hmang. Cutikah , mipi lamin heknak kan dongih, an tomi mawtaw bomb puah kan si. An zaten an thi thluh lo cu an vantha lam. Hrekkhat an tlansuak thei. Neta khalah mipi humhim in kan cangvai vivo ding a si,” tin a sim.
Thantlang Ah Ralhrang 6 An Thi – Chin ramkulh Thantlang khawpi sungah ralhrang ralkap le CDF Thantlang pawl may 23, zinglam nazi 7 ah an kap aw ih, khat le khat an doawknak ah ralhrang 6 an thi tin CDF Thantlang lam cun mipi an simthei.
Doawknak a um tinten mipi inn urkang ih cangvai ralhrang pawl cun Thantlang khawpi sungin inn 52 an urkang bet. Thantlang khawpi ahcun mipi zohman an um nawn lo ih, anmah ralhrang pawl lawng an um thlang. Ralhrang pawl umnak hmun a hnget tuk ruangah CDF Thantlang le CNA cun tutiang Thantlang khawpi sungin ralhrang pawl an dawisuak thluh thei hrih lo.
Ralhrang ralkap lam cun Thantlang ih doawknak ah thi kan um lo, meithal zunkhat, cerek bawm 5, kuttuah bomb 4 le CDF Thantlang fawm hruh ruang 2 kan sar lam tin thu an rak suah ve. Thantlang khawpi sungih doawknak thuhla ah khatlam khatlam in thu an suah veve ih, an thusuahmi lawngte a bangaw lo.
Leave a Reply