Ralhrang ralkap cun ram buainak ruangah Mizoram lamih tlan Myanmar mipawl cu Myanmar ah kuat kirsal dingin Mizoram cozah an dil ih, an umnak ding ziangkim kan rak buaipi ding tin cakuat ahcun an telh.
Cakuat cu ralhrang ramdang vuanci Wana Maung Lwin theihpimi rori a si ih, Kolkatta ih Myanmar Embassy cun Mizoram cozah an rak pehtlaih. Mizoram cozah lam cun Myanmar raltlan pawl an him hrih lo thu, an himnak ding buaipi hmaisa dingin ralhrang pawl an rak theihter ih, ralhrang lam cun theitawk an suah vivo ding thu an sim.
Ralhrang ralkap ih casuak cu hitin a si, “Thupi cu mizoram cozah hnenah nan hnenih Myanmar raltlan pawl Myanmar ih kuat kirsal ding dilnak a si. India ram ih tlan Myanmar rammi pohpoh cu an thuhla in theihter dingah kannih Myanmar ramdang vuanci zung cun kan beisei timi cu July 26 ih kan rak biakawk zo bangin ca thawn kan lo theihter betsal.
“Mizoram ih tlan Myanmar rammi pawl Myanmar ih an tlun theinak ding le Myanmar ih an umnak theinak dingah Mizoram cozah cun Kolkatta ih Myanmar Ebassy hnenah kan cakuatmi thawn pehpar aw in theihternak an rak nei ve. Mizoram lamih ca in kuat dan vek asile Myanmar raltlan pawl cu an himnak ding buaipi hrih a ttul thu an rel ih, cumi ruangah tuanvo neitu pawl cun a takin Mizoram ih tlan Myanmar rammi pawl an tlun theinak dingah an buaipi hrih ding.
“Mizoram ih Myanmar raltlan pawl Myanmar ih an tlun theinak ding thuhla thawn pehparaw in ram pahnih palai cun kan tawlrel peh dingih Central cozahpi in ziangkim a tawlrel ttul thu khal India cozah hnenah kan theihter zo. Curuangah Central cozahpi in Mizoram ih Myanmar raltlan pawl tlun theinak ding kan buaipimi cu rem in tisak dingah kan lo theihter duh a si,” tin ralhrang ramdang vuanci in Mizoram cozah le India cozahpi ca a kuatmi a darhsuak.
Hakha Ah Ralhrang 12 An Thi – Chin ramkulh Hakha peng sungih ni 2 sung doawknak ah ralhrang 12 an thi tin’ August 12 zingah Hakha dothlengnak pawlkom cun mipi theihternak an nei.
Hakha dothlengnak pawlkom cun “August 11 zinglam nazi 8:50 hrawngah Hakha ih Vuanci innpi kan va kap. Ralhrang pathum fuh tukin kan kap ngah ih, an lakin ralhrang pahnih cu an thi rori ding tin kan zum. August 11 ah kan sniper kap thiam pawl cun ralhrang umhmun an kap ih, ralhrang pawl cu Timit lamah an tlan ciamco. Cuveten mipi ralkap lamin an pan cih hngal ih, sun nazi 2:30 in zanlam nazi 4 tiang an kap aw. Doawknak ah ralhrang a malbik 10 an thi. Kan mipi ralkap in doawknak hmun an zohfel ih ralhrang pawl tanmi phone, tangka , power bank le airphone pawl an hmu ih, an laksak thluh a si,” tin thu an suah.
Tuini August 12 khalah Hakha le a kiangkap ah doawknak a um peh tin kiangkap mipi cun an sim ih, doawknak hmun cu Timit lam le Hakha ih ralhrang hmunpi kiangkap an si. Hakha kiangih mi 3 tomi Pajero mawtaw khal ralhrang pawlin an kap ciamco ih, mawtaw sungih to mi pathum lakin pakhat a thi. Mithi cu Siang Hnem Par ( kum 27 ) a si ih, Falam lamah a ruang an phur cih. Midang pahnih cu an hriamhma naa lo ih, sizung in an suak thei lo tin buaipit pawl cun an sim.
Datsi Zuar Siang Lo Pawl Ralrinnak An Pe – Shan ramkulh saklam myone pawl ah datsi dawr ong lo an um hnuaihni ih datsi a cem taktak maw tin Mipi humhimtu PSDA cun an cek tum. An cek caan ah datsi nei cingin zuar siang lo ih, rettha pawl an hmuh asile hremnak an pek ding thu an than.
Shan ramkulh hmun hrekkhat ah datsi a cem , zuar ding a um nawn lo tin’ dawr hrekkhat an dawr an khar ih, datsi zuar dawr hrekkhat khal datsi Liter khatah thawng 9000 an ngen. Hivek ruangah PSDA cun datsi zuar lo ih, dawr khar pawl an dawr ceksak an tum ih, nei cingih zuar lo pawl cu hremnak pek an tum.
PSDA cun ‘Shan ramkulh Muse myone, Nankham myone, Pansai’ myone le Kuatkai myone pawlah ramleng in datsi a lut nawn lo an ti ih, datsi man a kai ciamco tlunah dawr hrekkhat an khar. Tu ah datsi man a tla hrethro sal nan, dawr hrekkhat an ong cuang lo. Curuangah mipi tamzet cu datsi lei ding an hmuh lo ruangah an buai tuk ih, kannih in kan ngaihtuah tuk ve.
“Curuangah kannih cun kan cangvaihnak hmunram sungah cekfelnak kan nei dingih, datsi nei lo ruangah zuar lo taktak an si maw timi kan fiah ding. Ka cek caan ah datsi nei kerker cingin mipi hnenih zuar duh lo dawr kan lo hmu asile nan phutawk hremnak kan lo pe ding a si,” tin thu an suah.
Khua Thianfainak Nei Lo Dingin An Hro – Sagaing ramthen Depayin myone Moekyikan ( မူးကြီးကမ်းကျေးရွာ ) khua cu August 9 le 10 ah ralhrang ralkap pawlin an luhcilh ih, khua sungih inn zaten an urang sak thluh. Inn hrekhat cu a ziam thluh ih, inn hrekkhat kang nan, inn dinglai tivek an um.
Tu ahcun ralhrang ralkap pawlin khua an suahsan zo nan, khua mipi pawl cu khua thianfai an siang lo ih, khua thianfai dingin khua ah nan lut asile PDF ah kan lo ret dingih ralthuampi in kan lo kap ding tin ralhrang pawl cun khua mipi pawl an hro. Khua mipi pawl cu kiangkap khua le hramlak ah relh rero an si. khua luhcilhtu ralhrang pawl cu mipum an tam tuk tlunah ralthuam famkim an kengih, mipi ralkap pawlin an rak kham neh thei lo.
Khuami pakhat cun “Tu ah ralhrang tamsawn khua in an suak zo nan kan khua kiangih umhrih ralhrang pawl cun khua sungih luh an siang lo. Khua sung nan lut asile ralthuampi in kan lo kap ding in ti. Curuangah, khua mipi pawl cu khua ah kan lut ngam hrih lo a si,” tin a sim.
Mipi Inn Urkangtu Ralhrang 10 An That – Sagaing ramthen Ye Oo myone ah mipi inn urkangtu ralhrang ralkap pawl cu lamlak ah mipi ralkap komkhawm in bomb puah in an do ih, ralhrang 10 an thi tin thu an suah.
Freedom Revolution Froce cun “Tuini August 12, zinglam nazi 7:50 hrawngah Sagaing ramthen Ye Oo myone Chantar khua ih riak ralhrang mipum 120 hrawng cu kannih mipi ralkap komkhawm pawlin Kuan-ung khua kiangah bomb puah in kan rak kap ih, Bomb kan puahmi ah ralhrang 7 an thi. Ralthuampi le meithal ih doawknak ah ralhrang 3 an thi bet. Ralhrang thi zaten 10 an si ih, kannih mipi ralkap komkhawm lam cu kan him a si,” tin thu an suah.
FRF hotu cun “Ralhrang pawl khua in an suak ding timi kan thei cia ih, lamlak ah bomb kan rak kam. Bomb kan kamnak an thlen zawngah kan bomb kammi kan puah ih, kan kap ciamco cih.Mipi inn urkangtu an si ruangah kan kap tengteng dingin kan bawh ciami an si,” tin a sim.
Ralhrang In Bomb Zamthei Lei An Tum – Ralhrang ralkap cun Russia le India tuantlang ih tuahmi Brahmos Missile (Bomb zamthei ) lei an tum ih, sumpai pek hngal ding an neih lo ruangah ralhrang cun India hneah tangka cawi an dil ih, cumi in lei an tum tin’ Defense Express cun a tarlang.
Russia lamih thuthang darhsuak hmaisa bik a si ih, Russia lam cun a rangthei bikin ralhrang hnenah India thawn an tuantlangmi bomb zamthei Missile zuar lohli an duh. Tuitum ih ralhrang lei tummi bomb zamthei cu SU-30 raldonak vanzam in a phur thei , a kap cih thei. Tu ah ralhrang ralkap cun raldonak lawngpi 5 an nei ih, bomb zamthei phurtu raldonak lawng 3 le bomb zamthei missile kahnak lawng 5 an nei tin thuthang cun a tarlang.
India le Russia tuantlang ih an tuahmi Brahmos Missile cu a awn hnakin a rang sawn tin a tuahtu pawl cun thu an rak suah zo ih, lawng parin a kah theih tlunah vanzam khalah a hman theih ih, leipar khal ah a hman theih. 1998 kum in India le Russia tuangtlang cun an rak tuahsuak zo.
Ralhrang cun bomb zamthei lawng siloin Russia le N.Korea rinsan in Nuclear bomb khal an buaipi thup rero ih, Nuclear bomb neih ve rori an tum tin kan dung lamah thu a rak suak hmaisa zo.
Leave a Reply