Russia in Ukraine an donak thla 4 a kim zik thlangih, ram pahnih cu Ukraine nisuahnak lam ah nasa ten do aw rero an si.
Thla 4 zikte Russia in Ukraine an do zo tikah Ukraine khawpi tamzet a siat ih, mipi in an tuar tuk. Russia cu Ukraine ram sungih lutsawn an si tikah Russia mipi le ram cun thih le siatnak an tuar ve lo. Asinan, Russia ralkap tamtuk an thi zo ih, ralthuam tampi kan siatsak zo tin Ukraine lam cun an sim.
Ram pahnih buainak thla 4 a kim zik nan, Russia lam dungsip an tum hrih lo ih, kan sinak pholang dingin zahnak sihte tiatte khal kan nei lo. Nato le US ruangah hivek dinhmun thleng kan si tin an sim.
Russia ramdang vuanci Lavrov cun “Kannih Russia cun leitlun ah zo kan si timi langter dingin zahnak sihte tiatte khal kan nei lo. Ukraine ram la dingin kan do a silo ih, thianfainak kan nei sawn. Cucu, US le NATO pawlkom khal kan sim rero nan, an theifiang duh lo.
“Thungai in kan rel asile tuvek dinhmun thleng dingin US le NATO cun Ukraine an forh ih, buainak an suakter. US le NATO pawlkom in Ukraine cu an kutah an hmangih, Ukraine hmangin rul umnak kua an pur awter men a si,” tin BBC a simthei.
A tufang cu Russia ralkap pawlin nasa ten Donbas ramthen sung an do ih, Ukraine ram ihsin laksuak fel an tum. Ukraine cun ramdang bomnak tel lo cun an ralthuam le ralkap an thlauawk tuk thu an sim rero zo.
US cun Ukraine hnenah ralthuam kan pe bet rero ding tin thu an rak suah ve ih, US in Ukraine hnenih ralthuam a pek dingmi ah hlaral kahnak , bomb zamthei kahnak tivek khal a tel tin an tarlang. Hivek a si tikah ram pahnih cu an do aw vivo hrih dingin a lang.
Leave a Reply