USDP In Chairman Thar An Nei

USDP In Chairman Thar An Nei – October 4 in Naypidaw an hmunpi ih tonkhawmawknak nei thok zo USDP party cun Chairman thar an neih zo thu mipi theihternak an nei.

USDP Chairman bik U Than Hty cu damlonak ruangah a sinak in a cawlsung ih,U Khin Yee cu lailak USDP party Chairman ah an rak ruat. Tu ahcun U Than Hty in USDP party Chairman sinak a cuh nawn lo ding thu a rel zo ruangah USDP cun an party Chairman hnget ah U Khin Yee an nemhnget thu mipi an theihter zo.

USDP Chairman thar U Khin Yee hi ralhrang bohmu chuk in cawl zo a si ih, Thein Sein cozah san ah lah-wah-kah vuanci a rak si. 2016 kum in USDP party Chairman bawmtu a si thok ih, ralhrang in rampi thuneihnak an lak hnuah ralhrang cun lah-wah-kah vuanci thar ah an rak kuatsal.

USDP in tonkhawmawknak an neih hlante ah U Khin Yee cu ralhrang lah-wah-kah vuanci sinak in a cawl ih, lailak USDP chairman a tuan hnuah tu ahcun USDP party Chairman hnget ah an ret zo. USDP Chairman bawmtu le sungtuan pawl khal ralhrang in cawl zo hlir an hril.

USDP party hi Than Shwe in rampi thuneihnak a rak lak sungah Thein Sein ih rak dinmi a si ih, 2010 rampi hrilawknak ah nehnak an rak co ve. Tuitum an meeting khal a lengmi an tel lemlo ih, anmah ralhrang lam lawnglawng an si tin an sim.

Ralhrang Ralthuampi Retnak Hmun An Kap – Chin ramkulh Mindat peng sungih ralhrang ralthuam retnak hmunpi cu October 5, zinglam nazi 11:30 hrawngah CDF Mindat in an kap ih, ralhrang thi le hriamhma ngah an um tin CDF Mindat cun thu an suah.

CDF Mindat cun “October 5, zinglam nazi 11:30 hrawngah ralhrang ralkap pawlih ralthuampi retnak hmun cu kannih CDF Mindat in naivaiten kan va kap ih ralhrang thi an tam nan, a zat kan fiah thei lo. Ralhrang ralkap pawl cun ralthuampi in kiangkap an kap ciamco ve ih, mipi inn pakhat an kap siat ih, siatnak thleng le hriamhma ngah pawl cu kan zingzoi rero lai a si,” tin thu an suah.

Chin ramkulh Mindat ahcun ralhrang pawlin Mindat khawpi sungah bikhiah nei in mipi pawl fangfai an leiter ih, CDF Mindat pawl ei ding nei lo dingin tuah an tum nan, ralhrang pawl an hlawhsam ringring ih, CDf Mindat pawl ralhrang do in an cangvai thei ringring lai.

Ralthuam Thawn Pyu Saw Htee An Kai – Tanintharyi ramthen Ngiopin Kun khua ah Pyu Saw Htee sungtel pakhat ralthuam thawn an kai tin mikpi ralkap lam cun thu an suah.

Mipi ralkap cun “October 4, zanlam nazi 3:30 hrawngah kannih mipi ralkap pawl cun Pyu Saw Htee pakhat kan kai ngah. Pyu Saw Htee cun M-16 meithal zunkhat, kutden bomb 1, cerek 157 , cerek bawm 5 ,cerek khamnak kor pakhat pawl a rak kengih, cumi pawl khal kan laksak thluh.

“Tu ahcun kan kaihmi Pyu Saw Htee sungtel Ko Naing timi cu tlunlam hruaitu pawl hnenah kan thlenih annih in a tul dan vekin a tlun thu an relcat sak ding a si,” tin thu an suah.

Komkhawm In Ralhrang An Kap – Sagaing ramthen Watlet myone Sein Naingkui kiangah mipi ralkap komkhawm cun ralhrang umkhawm pawl an kap ih, ralhrang 6 an thi tin thu an suah.

Chindwin Attack Force cun “Ralhrang mipum 80 hrawng an si ih,kannih mipi ralkap komkhawm cun ralthuampi le meithal thawn kan kap ciamco. Nazi 1:30 sung kan kap aw ciamco ih, doawknak ah ralhrang 6 an thi. Doawknak a rei hnuah ralhrang dang an thleng betih, kannih mipi ralkap lam cu kan himnak hrang dung kan sip. Tuitum ah kanmah lawng siloin PDF komkhawm 7 in ralhrang do kan si,” tin thu an suah.

Rakhine Ah Ralhrang In Raldonak Vanzam An Hmang – Rakhine ramkulh Ratih Tuang myone sungah ralhrang ralkap cun October 5 zingah ralthuampi an kap ciamco ih, raldonak vanzam khalin khua kiangkap an kap ciamco tin khuami pawl cun BBC an simthei.

Ratih Taung myone sungin ralhrang hmunpi 4 pawl cun duhtawkin ralthuampi an kap ciamco ih, ralhrang raldonak vanzam pakhat khalin tlunlam in khua kiangkap a kap ciamco ve.

Khuami pakhat cun “Zinglam nazi 9 hrawngin ralhrang pawl cun ralthuampi an kap ciamco. Cumi hnu reilo ah ralhrang raldonak vanzam khalin duhtawk in hnuailam a kap ciamco ve. Doawknak cu a um lo a bang nan, anmah ralhrang pawlin khua kiangkap an kap ciamco ih an duhsan kan thei ve lo a si,” tin a sim.

September thla sungah AA le ralhrang pawl cu Rakhine ramkulh sung le Chin ramkulh Paletwa peng sungah nasaten an do aw ih, Ratih Tuang myone sung khalah doawknak a sosang. Cutikah ralhrang pawl cun AA pawl umnak hmunih an ruahnak pawl rinhmang in an kap ciamco in a lang. Ralhrang pawlin duhtawk in ralthuampi le raldonak vanzam in hnuailam an kah ciamco ruangah mipi lakin mi pakhat hrimhma a um zo tin an sim.

Ralhrang Pawl An Talbuai – NUG humhimnak vuanci U Yee Mon cun mipi le mipi ralkap pawl thapeknak a nei peh ih, a tufang ah ralhrang pawl suahnak ding lamzin an nei nawn lo ih, talbuai in an um tin a sim.

NUG humhimnak vuanci cun “Tuini ah ralhrang dinhmun kan zoh asile Politics dinhmun in suahnak ding an nei nawn lo ih, ral dinhmun khalin suahnak ding an neih nawn lo ruangah an talbuai thluh zo. Ralhrang in rampi hrilawknak tuah an tummi, tlangpar ralthuamkai pawlkom biakrem an tummi le 2008 daan hrampi rem dingin an tongmi pawl cu an uknak feh tluang vivo dingin an duhnak men a si.

“Ziangruangah ralhrang in hrilawknak tuah an tum ti asile 2020 rampi hrilawknak a takin hlohter an duh ruangah a si. Ralhrang pawl cun hrilawknak cu tuah ko haiseh mipi in kan pom cuang lo ding. Democracy duhtu taktak Party pawl khal ralhrang tuahmi hrilawknak ah an tel lo ding. Ralhrang ih sinak taktak cu kannih mipi pawlin kan theifiang tuk zo.

“Mipi ralkap lamin hmunram kan lak vivo tikah ralhrang pawl cun rampi huapin hrilawknak kan tuah thei lo ding timi khal an thei aw zo. Asinan, an duhmi cu hrilawknak kan tuah timi a si ih, thuneihnak kaih vivo an tumnak ah an hmang ding. Tlangpar ralthuamkai lak khalah dothlengnak ih theitawk suahtu tampi an um.

“Ralhrang pawl ih tihbikmi cu dothlengnak ah tlangpar ralthuamkai zaten an tel thluh pang ding timi a si ih, cumi ruangah ralhrang pawl cun a phunphun in tlangpar ralthuamkai pawl an leem. Tlangpar ralthuamkai hotu pawl khalin ralhrang hnenin zianghman beisei ding a um lo timi cu an theifiang tuk ko ding.

“Ralhrang pawlin 2008 daan hrampi hlon ding vekih thu an relnak san khal a um ih, pakhat sawn cu 2008 daan hrampi vek rori cun rampi thuneihnak an la thei ve lo. Pahnihnak ahcun 2008 daan hrampi vek asile mipi hrilmi in covo 75% an nei timi a tel ih,ralhrang pawl humawknak ding a mal tuk. Curuangah, tu ahcun 2008 daan hrmapi hlon ding vekin an um ih,an rem ah si aw a hlun an ring ah si maw ralhrang tuahmi hrimhrim cu mipi hrang tha a um dah lo ding.

“Ralhrang duhzawng in ummen ding kan silo ih, kan zaten lungrual ding kan si. Ralhrang pawl an suahnak ding lamzin sialsak ding kan silo ih,caantha kan pe ding a silo. Kan ruahnak, kan thazang, kan fimnak le cahnak tlunah lungrualnak thawn ralhrang uknak a rang theibikin hlonhlo uhsi,” tin U Yee Mon cun mipi sawmnak a nei.

N.Korea In Japan Ram Sungah Missile An Kap – October 4 ah N.Korea cun Japan ram sungah Missile an kap lut tin Japan le S.Korea cun thu an suah ih, N.Korea cun US tuanpi pohpoh tibuai vivo an tum tin an tarlang.

N.Korea cun January thla khalah US tiang kap thei an timi Missile an rak kap suak zo ih, tuitum ah Missile zohsinnak vei tampi an nei zo. Asinan, Japan ram sung ahcun bomb zamthei an kap suak dah lemlo. 2017 kum hnuah tuitum cu avei khatnak N.Korea in Japan ram sungih Missile an kahmi a si.

Japan ramdang vuanci zung cun “Japan ram sung tipi ah N.Korea lamin Missile a tla. Cumi ruangah a kiangkap ih um mipi pawl cu hmunhim ah tthawn dingin thu kan pe ih, tthawnsuah rero an si. Hivek thilthleng ruangah kannih Japan khalin a tul dan vekin thungrulnak kan nei cih ding a si,” tin thu an suah.

N.Korea ih kahsuakmi Missile cu mipi umnak siloin Japan tipi parih a tlak ruangah thih phah le thilri siat phah tivek cu a um lo. Asinan, doawknak um lo caan ah ram pakhat in ramdang hmunram sungah a duhduh in ralthuam a kap lut thei lo timi daan an nei.

N.Korea cun tuikum sungah Missile zohsinnak an neitam tuk zo ih, anmah tibuaitu an um cun an ram humhimnak hrang a tul asile Nuclear bomb khal kan hmang mai ding tin thu an rak suah zo. Hivek dinhmun N.Korea ramri S.Korea le Japan cun US an rak tuanpi ih ral dinhmun ah raldo zirtlangnak tivek an nei. Cumi lungawi lo ah N.Korea i missle an kapsuak ciamco phahin a langih, Japan le S.Korea in ziangtin an thungrul ding timi cu theih a si hrih lo. S.Korea ahcun US le S.Korea cun ralthuam pholangnak an nei rero zo.